Прэзідэнт Украіны Уладзімір Зяленскі заявіў, што лёс міру на ўсходзе Украіны цалкам залежыць ад прэзідэнта Расіі Уладзіміра Пуціна, і заклікаў яго праявіць у гэтым пытанні «палітычную і чалавечую волю».
Зяленскі даў інтэрв'ю на расійскай мове вядучаму тэлеканала «Дом», створанага ўкраінскім урадам і закліканага вяшчаць на непадкантрольныя Кіеву тэрыторыі, у тым ліку анексаваны Крым, піша Бі-бі-сі.
Каментуючы свае перадвыбарныя абяцанні на працягу года скончыць вайну на ўсходзе краіны, Зяленскі сказаў: «Вы ж абяцалі праз год скончыць вайну … Вядома, вядома. Я вельмі гэтага хачу. Я ўсё раблю для гэтага. Але, на жаль, не ўсё ад мяне залежыць».
«Я сёння лічу — я абсалютна гэтага не хаваю — і прэзідэнт Расійскай Федэрацыі ведае маё меркаванне — я лічу, што сёння 90% поспеху ў пытанні вяртання Данбаса, у міры ва Украіне, у дэакупацыі нашай тэрыторыі — залежыць ад аднаго чалавека, — сказаў Зяленскі, пры гэтым не называючы прозвішча Пуціна.
— І дакладна трэба ведаць, што ён з гэтым жыве. І людзі на Данбасе павінны гэта разумець. Не павінны жыць нейкімі ілюзіямі — вось калі б ды каб … няма ніякіх калі б ды каб!».
Зяленскі пры гэтым сказаў, што Расія — гэта адзін з бакоў канфлікту на Данбасе, хоць і не хоча гэтага прызнаваць. Расійскія ўлады неаднаразова сцвярджалі, што Кіеў павінен весці прамыя перамовы з кіраўнікамі непрызнаных «ДНР» і «ЛНР», а Масква ў супрацьстаянні не ўдзельнічае.
Каментары