Гурт The Road Dogs напісаў песню на верш Купалы «Я мужык-беларус»

Мінскія блюз-рокеры The Road Dogs выдалі дэбютны альбом, над якім працавалі цягам апошняга года. Прыхільнікі чакалі ад гурту альбом англамоўных кавераў, якія RD выконвае на канцэртах. І не дачакаліся: кавер на «№ 1» толькі адзін. Што, на думку музыкаў, можа і пакрыўдзіць фанатаў.

«Мы вельмі рады, што ў нас атрымалася запісаць дэбютны альбом не кавераў, як бывае ў многіх блюз-рокавых гуртоў, — прызнаецца вакаліст Сяргей Скляраў. — Мы, перш за ўсё, спяшаліся данесці да людзей свае песні, каб яны стварылі ўражанне менавіта пра нас. Але без кавераў не можам, таму першая песня — „Burning Hell“ Джона Лі Хукера. Таксама мы ўдзячныя нашаму паэту Янку Купалу, на верш якога мы зрабілі песню „Я мужык-беларус“. Ну, а астатнія цалкам усе нашы».

Альбом «№ 1» атрымаўся невялікім — толькі сем трэкаў. Сяргей прызнаецца, што і гэтага хапіла, каб зразумець усе складанасці студыйнай працы. Вынікам The Road Dogs задаволеныя, хоць і давялося прыцягнуць да звядзення і майстарынгу адразу двух гукарэжысёраў: Алега Даманчука (студыя MapleTree) ды Канстанціна Пыжова (The Toobes).

Дэбютнік The Road Dogs «№ 1» ужо можна знайсці ў музычных крамах. Магчыма, бліжэй да восені ён з’явіцца і ў вольным доступе ў інтэрнэце. Тады ж будзе зладжаная і яго канцэртная прэзентацыя.

Каментары да артыкула