ЗША і Вялікабрытанія абмяняюцца кібератакамі
Барак Абама і Дэвід Кэмеран дамовіліся аб правядзенні тэставых кібератак адзін на аднога ў межах стварэння новай сістэмы абароны ад тэрарыстычных і іншых пагроз у сеціве, паведамляе BBC.
Фота з сайта massive.pr
Першыя ў свеце вучэнні такога кшталту пройдуць ужо ў гэтым годзе. Атакі будуць праводзіцца на фінансавы сектар: Банк Англіі і шэраг камерцыйных банкаў, Уол-стрыт у Нью-Ёрку і Сіці ў Лондане.
Далейшыя вучэнні закрануць крытычна важныя часткі нацыянальнай інфраструктуры. Таксама будзе падрыхтаванае новае пакаленне кіберагентаў. Амерыканскія ўлады плануюць удасканаліць заканадаўства дзеля барацьбы з кіберпагрозамі.
Дамова аб вучэннях была дасягнутая на сустрэчы прэзідэнта ЗША Барака Абамы і прэм’ера Вялікабрытаніі Дэвіда Кэмерана. Мяркуецца, што падставай для вучэнняў стала хакерская атака на Sony Pictures, якую звязваюць з рэакцыяй Паўночнай Карэі на выхад фільма «Інтэрв’ю».