Расея адмаўляецца ад радараў за мяжой

У першую чаргу гэта датычыцца арэнды ўкраінскіх РЛС, а пасьля ўсіх «іншаземных» радараў.

Касьмічныя войскі Расеі плянуюць адмовіцца ад карыстаньня ўсімі радыёлякацыйнымі станцыямі (РЛС), якія знаходзяцца за яе межамі. Пра гэта паведаміў на прэс‑канфэрэнцыі камандуючы Касьмічнымі войскамі Расеі генэрал‑палкоўнік Ўладзімер Папоўкін.

У першую чаргу гэта датычыцца арэнды ўкраінскіх РЛС, а пасьля ўсіх «іншаземных» радараў. Рашэньне зьвязанае з тым, што «ўсе РЛС, якія знаходзяцца ў краінах былога Савецкага Саюзу, залежаць ад волі дзяржаў — Украіны, Азэрбайджана, Казахстана, Беларусі. Таму мы будзем адмаўляцца ад усіх станцыяў, якія месьцяцца за мяжой, ня хочам залежыць ад тых дзяржаў, у якіх яны знаходзяцца,» — заявіў Папоўкін.

Паводле яго словаў, Расея ня можа быць упэўнена перш за ўсё ў РЛС ва Ўкраіне, таму што іх абслугоўваюць цывільныя спэцыялісты, а не вайскоўцы. Радары можа спыніць любая дывэрсія, да таго ж Расея ня можа поўнасьцю верыць іх паказаньням. «У Беларусі і Казахстане працуюць нашы грамадзяне, а ва Ўкраіне за РЛС адказвае нацыянальнае касьмічнае агенцтва Ўкраіны. Якая тут можа быць дакладнасьць?» — кажа расейскі генэрал.

Таксама сёньня Дзяржаўная дума Расеі дэнансавала Дамову паміж урадамі Расеі і Ўкраіны аб сродках сыстэм папярэджаньня аб ракетным нападзе і кантролю касьмічнае прасторы ад 28 лютага 1997 году. Міністар абароны Расеі Анатоль Сердзюкоў падпісаў рашэньне аб адмове ў арэндзе РЛС у Севастопалі і Мукачова.

Яраслаў Сьцешык, паводле замежнае прэсы

Каментары да артыкула