Дзень Волі ў Кіеве
+фота
Перад будынкам Генпракуратуры Ўкраіны адбыўся пікет, яго ўдзельнікі патрабавалі адмовіць Рэспубліцы Беларусь у экстрадыцыі Ігара Коктыша.
25 сакавіка ў 12.00 перад будынкам Генпракуратуры Ўкраіны адбылася акцыя ў падтрымку Ігара Коктыша, які ўтрымліваецца ў Сімферопальскім СІЗА. І. Коктыша чакае экстрадыцыя ў Беларусь, дзе яго вінавацяць у забойстве.
Арганізатарам акцыі выступіў прэзідэнт Інстытута дзяржаўнасці і дэмакратыі Іван Лазавой. Удзельнікі пікету трымалі транспаранты і лозунгі «Свабоду Коктышу», а таксама бел-чырвона-белыя сцягі, што сімвалізавала салідарнасць з беларускім народам, які ў той жа самы дзень адзначаў Дзень Волі.
Жонка Ігара Ірына Цюцюннік выпусціла з клеткі белага голуба, што сімвалізавала вызваленне беларускага апазіцыянера. Пасля пікету Генпракурору Ўкраіны перадалі пісьмовы зварот з патрабаваннем адмовіць Рэспубліцы Беларусь у экстрадыцыі Коктыша, а таксама адпусціць яго з-пад варты неадкладна.