Зяленскі — Джонсану: Наступныя 24 гадзіны будуць вырашальныя для Украіны
Увечары 27 лютага прэзідэнт Украіны і прэм'ер-міністр Брытаніі правялі тэлефонную размову, падчас якой Зяленскі сказаў Джонсану, што наступныя 24 гадзіны будуць вырашальнымі для Украіны.
Фота: president.gov.ua
«Пагаварыў з прэм'ер-міністрам Вялікабрытаніі Борысам Джонсанам і прэзідэнтам Польшчы Анджэем Дудам аб актуальнай сітуацыі бяспекі. Узгаднілі далейшыя сумесныя крокі па супрацьдзеянні агрэсару. Антываенная кааліцыя ў дзеянні!» — цытуе прэс-служба ўкраінскага лідара яго словы.
«Прэзідэнт Зяленскі сказаў, што лічыць, што наступныя 24 гадзіны будуць вырашальнымі для Украіны, і прэм'ер-міністр заявіў, што зробіць усё магчымае, каб забяспечыць Украіне абарончую дапамогу з боку Вялікабрытаніі і саюзнікаў», — прыводзяцца словы брытанскага прэм'ера.
Джонсан назваў супраціў украінскага народа гераічным.
Таксама лідары Украіны і Брытаніі дамовіліся аб далейшых цесных кантактах, і Джонсан чарговы раз пацвердзіў цвёрдую падтрымку Вялікабрытаніяй суверэнітэту Украіны.