Камедыя не па Пінігіну
Сяргей Гурэнка стаў новым галоўным трэнерам мінскага «Дынама». 27-гадовы Кірыла Альшэўскі адпрацаваў з камандай усяго тры тыдні. Гэта ўжо дваццаты трэнер за няпоўныя дзесяць гадоў клуба.
Сяргей Гурэнка, Фота «ФК Дынама-Мінск»
У пятніцу днём новым галоўным трэнерам футбольнага мінскага «Дынама» стаў экс‑капітан нацыянальнай зборнай 36‑гадовы Сяргей Гурэнка.
Ён змяніў на гэтай пасадзе 27-гадовага Кірылу Альшэўскага, які адпрацаваў з камандай толькі тры тыдні. Альшэўскі, у сваю чаргу, прыйшоў 27 ліпеня на змену сербскаму спецыялісту Славалюбу Мусліну.
Усяго са снежня 1999 г., калі вядомы прадпрымальнік і кіраўнік холдынгу «Трайпл» Юры Чыж стаў старшынём назіральнай рады ЗАТ «ФК «Дынама‑Мінск»,
Гурэнка — ужо дваццаты (!) галоўны трэнер.
У сярэднім атрымліваецца па два спецыялісты на год…
Мяркуючы пра ўсім, Сяргей Віталевіч, які гуляў у італьянскіх «Роме», «П’ячэнцы» і «Парме», іспанскай «Сарагосе», маскоўскім «Лакаматыве», цяпер завершыць кар’еру футбаліста і засяродзіцца выключна на трэнерскай працы.
Кірыла Альшэўскі, хутчэй за ўсё, вернецца ў дубль «Дынама», якім ён паспяхова кіраваў да 27 ліпеня 2009 г. — пад яго кіраўніцтвам найбліжэйшы рэзерв галоўнай каманды ўпэўнена займаў першае месца.
Галоўныя трэнеры мінскага «Дынама» з канца 1999 г.
- 1. Юры Курненін
2. Павел Раднёнак
3. Аляксандр Піскароў (Расія)
4. Георгі Кандрацьеў
5. Эдуард Малафееў
6. Андрэй Зыгмантовіч
7. Веніямін Арзамасцаў (у якасці в.а)
8. Георгі Гюраў (Балгарыя)
9. Анатоль Байдачны
10. Пётр Шубін (Расія)
11. Юры Шуканаў
12. Аляксандр Башмакоў
13. Аляксандр Рабаконь (Украіна)
14. Аляксей Пятрушын
15. Пётр Качура
16. Аляксандр Хацкевіч
17. Ігар Крывушэнка
18. Славалюб Муслін (Сербія)
19. Кірыла Альшэўскі
20. Сяргей Гурэнка
***
За гэтыя няпоўныя дзесяць гадоў сяміразовы чэмпіён Беларусі «Дынама» адзін раз заваявала чэмпіёнскі тытул (у 2004 г., галоўны трэнер — Юры Шуканаў), чатыры разы станавілася віцэ‑чэмпіёнам (2001 — Малафееў; 2005 — Рабаконь; 2006 — Пятрушын, 2008 — Муслін), двойчы фінішавала на трэцім месцы (2000 — Раднёнак; 2003 — Байдачный). У 2003 г. пры Георгі Гюраве ўзяло Кубак Беларусі.