Сілавікі на вучэннях адпрацоўвалі змаганне з чэргамі на выбарчых участках
Міністр унутраных спраў Іван Кубракоў расказаў пра вучэнні па разгоне мітынгаў, якія праводзяць сілавікі ў гэтыя дні.
Фота: МУС Беларусі
Кубракоў заявіў, што сілавікі адпрацоўваюць эпізоды 2020 года.
Прычым, мяркуючы з ягоных слоў, міліцыянераў вучылі і змагацца з чэргамі на выбарчых участках, якія Кубракоў назваў «штучна створанымі».
«Сёння адпрацавалі эпізоды, якія адбываліся ў рэспубліцы ў 2020 годзе, а таксама тыя, што мелі месца ў іншых краінах. Бо ў нас пачыналася ўсё з банальнага — чэргаў на выбарчыя ўчасткі. Яны штучна ствараліся, каб сабраць людзей і потым вывесці іх на цэнтральныя вуліцы, перакрываць дарогі», — адзначыў Кубракоў.
Акрамя гэтага, сілавікі адпрацоўвалі абарону адміністрацыйных будынкаў і іншых аб'ектаў, а таксама прымяненне тэхнікі супраць пратэстоўцаў.
У 2020 годзе ў дзень прэзідэнцкіх выбараў на ўчастках у Беларусі і за мяжой быў ажыятаж, камісіі не спраўляліся з наплывам людзей. Многія беларусы гадзінамі стаялі ў чэргах на ўчастках, каб аддаць свой голас.
Чытайце таксама:
У 44 гады памёр начальнік міліцыі Слаўгарада. У 2020-м ён скардзіўся на надпіс «3%»
«Стануць сябрамі камісій, назіральнікамі». Ветэранаў МУС задзейнічаюць у выбарах
Колькасць міліцэйскіх відэакамер у Беларусі перавысіла 40 тысяч штук