«Няма попыту на дашкольную групу». Што будзе з садком пры беларускамоўнай гімназіі ў Вільні
Бацькі хвалююцца, што з верасня не будзе працаваць садок пры Скарынаўскай гімназіі ў Вільні.
Віленская гімназія імя Францыска Скарыны
Сітуацыя атрымалася складаная. З аднаго боку, ахвотных трапіць у Скарынаўскую гімназію ў Вільні (адзіную ў Літве, дзе навучанне вядзецца на беларускай мове) так шмат, што летась каля 50 дзяцей, якія хацелі вучыцца там, атрымалі адмовы. Сёлета з’явіліся добрыя навіны: у наступным навучальным годзе плануюцца два 5-я класы і з'явіцца 10—15 месцаў дадаткова.
З іншага — бацькі абмяркоўваюць, што, магчыма, не будзе садка пры гімназіі.
«Наша Ніва» звярнулася ў навучальную ўстанову па каментарый.
Там растлумачылі, што на наступны навучальны год няма попыту на дашкольную групу (гаворка ідзе пра дзяцей 4-5 гадоў), таму ў гімназіі будзе працаваць адна група — падрыхтоўкі да школы (там займаюцца дзеці ўзросту 5-6 гадоў).
Вызваленыя памяшканні выкарыстаюць пад дадатковыя кабінеты для старшакласнікаў: новыя класы немагчыма было адкрыць, бо для іх бракавала кабінетаў.
Чытайце таксама:
У беларускай гімназіі ў Вільні з'явяцца дадатковыя месцы. Але заяўкі трэба пакідаць зараз
Беларусы Вільні стварылі ініцыятыўную групу для адкрыцця новай беларускамоўнай школы