Большасць палітвязняў, вызваленых сёння, выслалі ва Украіну
Украінскі Каардынацыйны штаб па пытаннях абыходжання з ваеннапалоннымі паведаміў, што акрамя 5 ўкраінскіх грамадзян, вызваленых Лукашэнкам у паразуменні з ЗША 13 снежня, ва Украіну прыбылі таксама 104 грамадзяніны Беларусі.
«Большасць з іх — грамадзяне Беларусі, асуджаныя па палітычна матываваных справах пасля прэзідэнцкіх выбараў 2020 года і пратэстаў, якія ішлі за імі. Гэта палітыкі, актывісты, удзельнікі пратэстаў, сябры перадвыбарных штабоў апазіцыйных кандыдатаў, блогеры, журналісты і звычайныя грамадзяне, абвінавачаных у «арганізацыі масавых беспарадкаў», «закліках да дзеянняў супраць нацыянальнай бяспекі» і паводле іншых аналагічных артыкулаў», — паведамляе Каардынацыйны штаб.
Сярод вызваленых пералічваюцца Марыя Калеснікава, Віктар Бабарыка, Максім Знак, Марына Золатава, пра вызваленне якіх паведамлялася раней.
Акрамя таго, стала вядома, што на свабоду выйшаў палітык, адзін з лідараў Беларускай хрысціянскай дэмакратыі Павел Севярынец.
Таксама згадваюцца прозвішчы
- Марыны Санкевіч, асуджанай за каментары ў сацыяльных сетках да 7 гадоў пазбаўлення волі;
- 70‑гадовай гамяльчанкі Сафіі Бачурынскай, асуджанай да 2 гадоў калоніі за «абразу Лукашэнкі»;
- жыхара Гомеля Уладзіслава Яцэнкі, пасаджанага на 5 гадоў за перавод 21 еўра для палка Кастуся Каліноўскага;
- псіхолага Сяргея Іванцова, затрыманага ў красавіку 2023 года за тое, што нібыта пісаў каментары ў бот канала «Беларусь галаўнога мозгу» і асуджанага да 4 гадоў пазбаўлення волі;
- пенсіянеркі Наталлі Малец, асуджанай на 3 гады за тое, што была ў фэйсбуку ў суполцы «Лісты салідарнасці Беларусь 2020».
Марыя Калеснікава трапіла ў адзін кадр з кіраўніком ГУР Буданавым, які сустракаў вызваленых на ўкраінскай мяжы
Кірыла Буданаў і Марына Золатава
Максім Аўрэньеў. Ён украінец, але жыў у Беларусі
Вызвалены палітвязень Дзмітрый Пражэцкі. Яго асудзілі за данаты
Таксама ў тэлеграм-канале «Хочу жить» з'явілася фота палітзняволенай 68‑гадовай пенсіянеркі Алены Гнаук.
Алена Гнаук
На свабоду выйшаў і Андрэй Шмай — грамадзянін Украіны, асуджаны за «шпіянаж»
Чытайце таксама:
«Байсол» запусціў збор для палітвязняў, вызваленых 13 снежня