Мінскі планетарый закрыецца на рэканструкцыю. Паказалі, як ён будзе выглядаць
Мінскі планетарый у парку Горкага неўзабаве закрыецца на рэканструкцыю. Кіраўніцтва ўстановы заклікае гараджан і гасцей сталіцы паспець наведаць апошнія паказы, бо ўжо з пачатку 2026 года будынак закрыюць на мадэрнізацыю.
Фота: planetarium.by
Паводле паведамлення планетарыя, запланавана поўнае тэхнічнае абнаўленне: заменяць інжынерныя сеткі, абновяць фасад, інтэр’еры і абсталяванне. Пра дакладныя даты закрыцця і аднаўленчыя працы абяцаюць паведаміць пазней.
З апублікаваных рэндараў відаць, што будынак захавае рысы савецкага канструктывізму — выразныя геаметрычныя лініі, вялікія вокны і характэрную неонавую шыльду.
Фота: planetarium.by
Рэканструкцыя планетарыя стане часткай агульнага абнаўлення комплексу будынкаў у парку Горкага. Ужо цяпер ідуць работы ў абсерваторыі: там дэмантуюць старыя элементы, усталёўваюць новыя вітражы, пракладаюць электрасеткі і выконваюць аздабленне. Асаблівай адметнасцю абсерваторыі стане новы купал з паваротам на 360 градусаў і індывідуальная падсветка калон.
Плануецца, што ўсе работы зоймуць каля трох месяцаў, таму адкрыццё абноўленай абсерваторыі чакаецца вясной 2026 года.
Чытайце таксама:
У Мінску пачалася мадэрнізацыя незвычайнага аб'екта: абсерваторыі Планетарыя ў парку Горкага
Пад планетарыем у Мінску сабралася вялікая чарга, каб пабачыць «крывавы» Месяц ФОТЫ
Найлепшы сярод падобных. Дзе можна знайсці копіі Мінскага планетарыя