Ці чыстае паветра ў беларускіх гарадах? 

Начальніца службы экалагічнай інфармацыі Белгідрамета Алена Мельнік падвяла папярэднія вынікі маніторынгу паветра ў беларускіх гарадах за 2025 год.

Здымак ілюстрацыйны. Фота: freepik.com

Агульная карціна ацэньваецца Белгідраметам як стабільная. Паветра ў большасці прамысловых цэнтраў краіны застаецца адносна чыстым. У гарадах з пастаянным кантролем узровень забруджвання часцей за ўсё ацэньваецца як «вельмі добры», «добры» або «ўмераны».

Аднак былі і праблемныя моманты:

Пыл. Найбольшая колькасць дзён з перавышаннем нормы зафіксаваная ў Гомелі, Брэсце і Віцебску, пікавыя значэнні ў Віцебску дасягалі 3,5 гранічна дапушчальнай канцэнтрацыі. Камунальныя службы павялічваюць паліў дарог для зніжэння пылу.

Дробнадысперсны пыл. Па гэтым паказчыку вылучаецца Жлобін — перавышэнне нормы было ў 19% выпадкаў, хоць за год узровень трохі знізіўся ў параўнанні з 2024 годам.

Дыяксід азоту. Сярэднегадавыя перавышэнні адзначаныя ў Магілёве і Жлобіне.

Прыземны азон. Перавышэнні звязаныя з прыроднымі фактарамі і гарачым надвор’ем, часцей за ўсё ў Брэсце, Гродне, Наваполацку, Полацку і Магілёве.

Фармаальдэгід. Перавышэнні былі ў 8‑мі не названых гарадах, але адзначаецца, што іх колькасць значна скарацілася ў параўнанні з мінулымі гадамі, магчыма, з-за прахалоднага і нестабільнага лета.

У той жа час у Салігорску, Баранавічах, Оршы, Бабруйску, Барысаве, Лідзе, Рэчыцы, Мазыры і Светлагорску перавышэнняў гігіенічных нормаў не зафіксавана.

Узровень такіх небяспечных рэчываў, як бенз(а)пірэн, свінец і кадмій у большасці гарадоў, як сцвярджаецца, застаецца стабільна нізкім.

Каментары да артыкула