Пах і плямы поту на адзенні могуць сапсаваць настрой і стварыць непрыемнае ўражанне аб чалавеку. З дапамогай простых і натуральных сродкаў можна лёгка вярнуць адзенню свежасць і чысціню.
Праблема паху і плям поту на адзенні актуальная круглы год, незалежна ад надвор’я. На колькасць поту ўплываюць не толькі тэмпература, але і індывідуальныя асаблівасці арганізма, эмацыянальны стан і нават генетыка.
Добрая навіна: свежы пот сам па сабе амаль не мае паху. Ён складаецца пераважна з вады з невялікай колькасцю солі, мачавіны, амінакіслот, малочнай кіслаты, тлушчу і цукру. Менавіта гэтыя рэчывы служаць ежай для бактэрый, якія жывуць на скуры. Непрыемны пах узнікае ў выніку іх жыццядзейнасці. Калі бактэрыі «ўсяліліся» ў валокны тканіны, праблема становіцца хранічнай. Але нават у такім выпадку ёсць рашэнні.
Выданне Heute.at прапануе паспрабаваць адзін з наступных натуральных метадаў папярэдняй апрацоўкі:
1. Воцат
Воцат — даўно правераны сродак, які выкарыстоўваецца ў хатніх умовах для ачысткі і дэзынфекцыі. Ён не толькі эфектыўна выдаляе забруджванні, але і знішчае пахі і бактэрыі.
Змяшайце ў вялікай ёмістасці цёплую ваду з адной шклянкай воцату (прыкладна 200 мл). Замачыце адзенне з пахам поту на гадзіну, а затым памыйце ў пральнай машыне. Адначасова воцат дапаможа ажывіць колеры.
Увага: Гэты спосаб не пасуе для белага адзення — могуць з’явіцца жоўтыя плямы з-за рэакцыі з рэшткамі дэзадаранту або арганічнымі рэчывамі поту.
2. Лімонная кіслата
Для белых тканін замест воцату выкарыстоўвайце лімонную кіслату — яна эфектыўна выдаляе як пах, так і плямы ад поту.
Растварыце 4 чайныя лыжкі лімоннай кіслаты ў 1 літры гарачай вады. Замачыце адзенне на гадзіну, а затым памыйце ў пральнай машыне.
Калі на адзенні відавочныя плямы ад поту, то ў такім выпадку дапаможа раствор 1 чайнай лыжкі лімоннай кіслаты (ці соку аднаго лімона) ў 100 мілілітрах вады.
Раствор нанясіце на пляму, пакіньце на 10 хвілін, а затым адзенне прапалашчыце.
Увага: Лімонная кіслата не пасуе для каляровага або цёмнага адзення, бо колер можа страціць сваю яркасць.
3. Харчовая сода
Замест воцату і лімоннай кіслаты з пахамі і плямамі выдатна справіцца харчовая сода.
Харчовая сода падыходзіць для натуральных тканін, такіх як бавоўна і лён, а таксама для паўсінтэтычных матэрыялаў, напрыклад віскозы.
Яна бяспечная для каляровых і цёмных тканін, у адрозненне ад лімоннай кіслаты, якая можа выклікаць выцвітанне, і для белых тканін, у адрозненне ад воцату, які можа пакідаць жоўтыя плямы.
Растварыце 1 сталовую лыжку соды ў 5 літрах вады. Дайце раствору пастаяць 30 хвілін, каб сода пачала дзейнічаць. Затым замачыце адзенне на ноч, а раніцай памыйце ў пральнай машыне.
Калі ж неабходна вывесці пляму ад пота, то тут дапаможа паста, прыгатаваная з 1 сталовай лыжкі соды і невялікай колькасці вады. Яе неабходна нанесці на пляму, пакінуць на 15 хвілін, а затым адзенне прапаласкаць.
4. Маразільная камера
Нізкія тэмпературы знішчаюць бактэрыі, якія выклікаюць пах. Гэты метад дапамагае «вымаразіць» пах.
Складзіце вопратку ў поліэтыленавы пакет і пакладзіце ў маразілку на 12 гадзін або больш. Гэты спосаб асабліва пасуе для вопраткі з далікатных тканін, якую нельга часта праць.
5. Спецыяльныя спрэі
У продажы ёсць спрэі для тэкстылю з іёнамі срэбра або антыбактэрыйнымі кампанентамі. Яны часова нейтралізуюць пах, але не вырашаюць асноўную прычыну. Калі бактэрыі ўжо «ўсяліліся» ў валокны тканіны, пах можа вярнуцца пасля наступнага выкарыстання ці нагрэву цела.
Да таго ж пастаяннае ўжыванне спрэяў без мыцця можа нават пагоршыць сітуацыю — яны маскіруюць праблему, але не чысцяць тканіну.
Дадатковая парада: пазбягайце сінтэтычных тканін
Людзям, якія шмат пацеюць, варта пазбягаць сінтэтычных матэрыялаў, бо яны слаба прапускаюць паветра і затрымліваюць вільгаць, ствараючы ідэальныя ўмовы для бактэрый. Лепш выбіраць адзенне з бавоўны, лёну або віскозы.
Гэтыя матэрыялы ўбіраюць пот і дазваляюць яму высыхаць, што памяншае ўмовы для размнажэння бактэрый, якія выклікаюць пах. Гэта асабліва важна для ніжняй бялізны і штодзённага адзення.
На жаль, у свеце «фаст-фэшн» большасць вопраткі вырабляецца з поліэстэру. Таму перад пакупкай варта ўважліва праверыць этыкетку, каб даведацца склад тканіны.
Каментары