Памёр вакаліст гурта «Чынгісхан» Вольфганг Хайхель
Памёр вакаліст і адзін з заснавальнікаў вядомага нямецкага дыска-гурта Dschinghis Khan («Чынгісхан») Вольфганг Хайхель. Музыка памёр ва ўзросце 75 гадоў.
Вольфганг Хайхель. Фота з сацсетак спевака
Як вынікае з паведамлення прадстаўнікоў музыкі ў інстаграме, Хайхель нечакана памёр яшчэ 20 студзеня ў сябе дома. Нават нягледзячы на тое, што апошнія гады ён меў вялікія праблемы са здароўем, смерць, якая прыйшла пасля часовага паляпшэння ягонага стану, стала поўнай нечаканасцю для сям’і, сяброў і калег.
Паводле інфармацыі выдання Bild, перад смерцю Хайхель праводзіў большую частку часу каля Бодэнскага возера. Са слоў крыніц выдання, яго пахаванне прайшло 11 лютага, на ім прысутнічалі толькі блізкія сябры і сваякі спевака.
Гурт Dschinghis Khan заснаваў у 1979 годзе ў ФРГ нямецкі прадзюсар і кампазітар Ральф Зігель для ўдзелу ў конкурсе «Еўрабачанне». Вольфганг Хайхель стаў галоўным вакалістам яго арыгінальнага складу.
На «Еўрабачанні» калектыў тады заняў чацвёртае месца з песняй Dschinghis Khan. Сярод наступных вялікіх хітоў гурта — Moskau, Rocking son of Dschinghis Khan і Loreley.