У Верхнядзвінскім раёне мужчына злавіў у капканы трох куніц
Жыхара Верхнядзвінскага раёна будуць судзіць за незаконнае паляванне. Паводле інфармацыі Следчага камітэта, 50‑гадовы мужчына незаконна ўпаляваў трох куніц.
У снежні 2025 года ён паставіў каля вёскі Новае Сяло чатыры капканы: тры на куніцу і адзін — на бабра або выдру. Пры гэтым мужчына не меў статусу паляўнічага і неабходных дазволаў.
Падчас першай праверкі капканаў ён знайшоў у іх дзвюх куніц, зняў з іх скуры і забраў здабычу дадому. Пры наступным абыходзе ў капкане аказалася яшчэ адна куніца.
Тушку жывёлы мужчына паклаў у заплечнік і накіраваўся да ракі праверыць чацвёрты капкан. У гэты момант яго заўважылі супрацоўнікі інспекцыі аховы жывёльнага і расліннага свету.
Следства высветліла, што абвінавачаны паляваў без дазволу і правяраў капканы ўначы, што забаронена пры паляванні без стрэльбы. На допыце ён сказаў, што не чакаў сустрэць у лесе іншых людзей.
Шкода, нанесеная навакольнаму асяроддзю, ацэнена больш чым у 4400 рублёў. Мужчына цалкам яе кампенсаваў.
Чытайце таксама:
Махляры злавілі мінчанку на футра з куніцы
Маладая рысь трапіла ў капкан у Бабруйскім раёне, потым давялося рабіць аперацыю
Куніца, якая гойсала па Мінску, загінула
На дрэве ў цэнтры Мінска ўвесь дзень сядзела куніца — зняць не маглі