Беларуска набыла дзіцяці джынсы Mark Formelle — а ў кішэні знайшла загадкавую запіску з кітайскімі іерогліфамі
Знаходка жанчыну здзівіла, бо яна наіўна верыла, што адзін з самых знакамітых беларускіх брэндаў шые адзенне ў Беларусі.
Беларуска Марыя апублікавала ў Threads фота дзіўнай знаходкі. Яна набыла дзіцяці джынсы айчыннага брэнду Mark Formelle, а ў кішэні аказалася паперка з кітайскімі іерогліфамі, напісанымі ад рукі.
Дарэчы, калі перакласці тэкст на беларускую, дык нічога незвычайнага ў ім няма: проста нехта занатаваў інфармацыю пра джынсы (мадэль, колер, памер і гэтак далей).
Сама Марыя верыла, што Mark Formelle шые рэчы на радзіме, таму была вельмі здзіўленая. І нават тэгнула афіцыйны акаўнт брэнду, каб атрымаць адказ на пытанне: «Як такое магчыма?».
Беларусы ў каментарах пачалі жартаваць і прапаноўваць свае пераклады:
«Там напісана: «я маленькая кітайса, шыю для дзядзечкі Фармэля жынсі, ратуйце/дапамажыце, прымушаюць працаваць у панчохах!»
«Тыдзень доўгі. Сярэбраны кот есць. Калі сіняе сустрэнецца з жоўтым на захадзе. Паездка ў Кітай гучыць нядрэнна, калі ісці асцярожна».
«Дык гэта ж на заслаўскай трасянцы напісана. Усе так у Заслаўі гавораць».
Нехта палічыў знаходку невыпадковай: «Гэта знак, што трэба вучыць кітайскую, зараз вельмі перспектыўна!»
А рэпетытарка кітайскай мовы скарысталася магчымасцю парэкламаваць свае паслугі: «Запісваемся да мяне на кітайскую. Навучу вас чытаць усе запіскі са штаноў».
Чытайце таксама:
Панчохі разладу: Mark Formelle зноў апынуўся ў цэнтры скандалу. Што на гэты раз здарылася?