У Нідэрландах падчас пракладання каналізацыі знайшлі фрагмент карабля вікінгаў
Падчас работ па пракладанні каналізацыі на паўднёвым усходзе ад Амстэрдама рабочыя трапілі на нечаканую знаходку — вялікі кавалак драўніны, які можа паходзіць ад карабля вікінгаў. З-за гэтага работы давялося часова спыніць, паведамілі ўлады горада Вейк-бей-Дурстэдэ.
Фота: facebook.com/gemeentewijkbijduurstede
Паводле наяўнай інфармацыі, знойдзены фрагмент мае даўжыню больш за тры метры і, магчыма, адносіцца да IX стагоддзя. Калі гэта пацвердзіцца, гэта будзе першая падобная археалагічная знаходка ў гэтым горадзе.
Фота: facebook.com/gemeentewijkbijduurstede
Гістарычна гэта месца вядомае як Дорэстад — важны гандлёвы цэнтр у VII—IX стагоддзях, які злучаў скандынаўскія землі з тэрыторыямі франкаў. Таму знаходка можа быць звязаная як з гандлем, так і з нападамі вікінгаў, якія часта адбываліся ў гэтым рэгіёне.
Фота: facebook.com/gemeentewijkbijduurstede
Каб дакладна вызначыць узрост драўніны, археолагам яшчэ трэба правесці дадатковыя даследаванні, у тым ліку аналіз гадавых кольцаў дрэва. Ёсць, праўда, таксама версія, што гэта можа быць не карабель вікінгаў, а больш позняе судна — напрыклад, гандлёвы «ког» з XIII—XIV стагоддзяў.
Знойдзены фрагмент ужо асцярожна дасталі і перадалі спецыялістам для далейшага вывучэння. У будучыні яго могуць выставіць у мясцовым музеі як важную гістарычную рэліквію.
Чытайце таксама:
На гарадзішчы на Менцы знайшлі фрагмент амфары з рунай
У Шумілінскім раёне падчас раскопак знайшлі паясную накладку часоў вікінгаў