У Свіслачы аўтобус упаў на кіроўцу, калі той яго рамантаваў
Інцыдэнт адбыўся ў студзені 2026 года на адным з прадпрыемстваў. Службовы аўтобус выйшаў са строю — заклініла стартар, і яго вырашылі адрамантаваць з парушэннем правіл бяспекі, паведамляе Следчы камітэт.
Фота: Следчы камітэт
50‑гадовы кіроўца паведаміў пра гэта свайму 62‑гадоваму кіраўніку, які адказваў за тэхніку бяспекі. Кіраўнік жа, замест таго каб накіраваць транспарт у аўтапарк для рамонту, загадаў выправіць няспраўнасць самастойна.
Кіроўца не стаў пярэчыць і заняўся рамонтам у працоўны час каля свайго дома. Ён падняў аўтобус дамкратам, падклаў драўляныя падпоркі і залез пад машыну. Аднак канструкцыя не вытрымала, і цяжкі аўтобус сарваўся, прыціснуўшы мужчыну.
У выніку пацярпелы атрымаў цяжкія траўмы, але цяпер яго жыццю нічога не пагражае.
Падчас праверкі высветлілася, што кіроўца не меў права выконваць такія работы — ён не прайшоў неабходнае навучанне і інструктаж. Сам ён пацвердзіў, што дзейнічаў па ўказанні кіраўніка, які таксама дазволіў трымаць службовы аўтобус у двары дома.
У дачыненні да 62‑гадовага інжынера-механіка завялі крымінальную справу за парушэнне правіл аховы працы, што прывяло да цяжкіх цялесных пашкоджанняў.
Чытайце таксама:
Сэрвісы ў Беларусі больш не абслугоўваюць аўтамабілі Geely кітайскай зборкі