У Мінску ацяпленне перавялі ў «самы эканомны рэжым»
У Мінску замест поўнага адключэння ацяплення ў перыяд пацяплення вырашылі перавесці сістэму ў «самы эканомны рэжым». Пра гэта паведаміла арганізацыя «Мінскэнерга».
Здымак ілюстрацыйны. Фота: «Наша Ніва»
З-за цёплага надвор’я ў батарэі цяпер падаецца цепланосьбіт з мінімальна магчымай тэмпературай і зніжанай цыркуляцыяй. У арганізацыі адзначылі, што тэмпература вады ў сістэме каля 70 градусаў — гэта самая ніжняя мяжа, якая дазваляе падтрымліваць нармальны ўзровень нагрэву.
Спецыялісты тлумачаць, што ў міжсезонне складана рэгуляваць тэмпературу ацяплення: ноччу яшчэ холадна, а ўдзень — значна цяплей. Дадаткова ўплывае і размяшчэнне будынкаў: у памяшканнях, якія выходзяць на сонечны бок, можа быць нават занадта горача.
У некаторых рэгіёнах Беларусі ўжо пачалі адключаць ацяпленне, але ў сталіцы пакуль вырашылі дзейнічаць больш асцярожна.
Звычайна поўнае завяршэнне ацяпляльнага сезона адбываецца па рашэнні гарадскіх уладаў. Ацяпленне ў сацыяльных установах адключаюць, калі тэмпература трымаецца вышэй за +10°C на працягу трох сутак, а ў жылых дамах — калі стабільна трымаецца вышэй за +8°C.
Чытайце таксама:
На Гомельшчыне ўжо пачалі адключаць ацяпленне — першымі ў краіне