Нацбанк выпускае манеты з выявай трактара — упершыню з нейзільберу
У Беларусі плануюць выпусціць памятныя манеты «Мінскі трактарны завод. 80 гадоў». Яны з’явяцца ў абарачэнні 22 красавіка, паведаміла прэс-служба Нацбанка.
Фота: Нацбанк
На манеце будзе выяўлены трактар, а таксама надпіс, прысвечаны 80‑годдзю Мінскага трактарнага завода.
Асаблівасць гэтых манет у тым, што ўпершыню для іх чаканкі выкарысталі нейзільбер — сплаў медзі, нікелю і цынку, які па знешнім выглядзе нагадвае срэбра.
Вырабяць манеты на гомельскім прадпрыемстве «Крышталь».
Плануецца выпуск двух відаў манет:
- наміналам 1 рубель з нейзільберу, накладам 3 тысячы асобнікаў;
- срэбная манета наміналам 20 рублёў, накладам 2 тысячы асобнікаў.
Манеты будуць лічыцца законным плацежным сродкам і іх можна будзе выкарыстоўваць без абмежаванняў.
Чытайце таксама:
Выходзіць новая партыя залатых манет «Славянка»