У Антарктыцы навукоўцы знайшлі новы востраў. Раней думалі, што гэта айсберг
Адкрыццё палярная экспедыцыя нямецкага Інстытута Альфрэда Вегенера зрабіла ў моры Уэдэла, у раёне, дзе вельмі шмат ледзяных глыбаў. Таму на спадарожнікавых здымках аб’ект не вылучаўся і выглядаў як чарговы айсберг.
Фота: Alfred Wegener Institute / Simon Dreutter
Нават калі даследчыкі наблізіліся да яго на караблі, спачатку яны таксама падумалі, што гэта лёд. Аднак пазней заўважылі адрозненне: ён меў больш шэры колер і выглядаў нібы пакрыты глеем або брудам, у адрозненне ад чыста белых айсбергаў.
Пасля больш уважлівага агляду стала зразумела, што гэта сапраўдны востраў. Ён пакуль не атрымаў назвы і будзе афіцыйна нанесены на геаграфічныя карты пасля завяршэння даследаванняў.
Фота: Alfred Wegener Institute / Simon Dreutter
Востраў вельмі малы: яго плошча каля 6200 квадратных метраў, гэта менш за некалькі гарадскіх будынкаў. Па форме ён выцягнуты — прыкладна 130 метраў у даўжыню і каля 50 метраў у шырыню. Найвышэйшы пункт узвышаецца прыкладна на 16 метраў над узроўнем мора.
Палярная экспедыцыя складалася з 93 навукоўцаў з розных краін. Яны займаліся вывучэннем дна мора і руху лёду, у тым ліку шэльфавага ледавіка Ларсэна. Даследчыкі таксама выкарыстоўвалі дроны, каб зверху сфатаграфаваць і замацаваць дакладнае размяшчэнне новага аб’екта.
Навукоўцы адзначаюць, што адкрыццё адбылося падчас работ у раёне, які лічыўся дрэнна вывучаным і патэнцыйна небяспечным для навігацыі.
Чытайце таксама:
Антарктыда мае «гравітацыйную дзірку». Што гэта такое і ці нясе пагрозу планеце?
У ледавіку каля Антарктыды знайшлі цела навукоўца, які загінуў у 1959 годзе
Адзін з самых стабільных ледавікоў свету пачаў раставаць з рэкорднай хуткасцю