Борыс Джонсан таемна правёў двое сутак на фронце пад Запарожжам

Пра гэта былы прэм'ер Брытаніі сам паведаміў у брытанскай Daily Mail, піша «Інтэрфакс-Украіна».

Фота: Jamie Wiseman / The Daily Mail

«Ехаць па галоўнай дарозе праз Камышаваху — гэта гульня з агнём, і большасць кіроўцаў проста ігнаруюць выбоіны, падобныя да кратараў, ды ціснуць на педаль газу. Расіяне хочуць захапіць гэта сяло, і яны прагнуць гэтага настолькі моцна, што, як заўсёды па-варварску, запускаюць адзін дрон за іншым, намагаючыся запалохаць жыхароў», — расказаў палітык пра свае ўражанні.

Фота: Jamie Wiseman / The Daily Mail

Джонсан апісвае, што шмат камунікаваў з украінскімі байцамі, адчуў іх стомленасць і жаданне заканчэння вайны, але ўпэўнены, што Украіна можа здабыць перамогу, калі Захад дасць дастаткова дапамогі.

«Пасля размоў з украінскімі салдатамі на перадавой я бачу іх знясіленасць і відавочнае чалавечае імкненне, каб вайна скончылася. Я быў поўны гневу — як і вы б былі — праз недастатковасць заходняй падтрымкі. Але пасля 48 гадзін на фронце я перакананы як ніколі, што ўкраінцы перамогуць, што аднойчы яны пазбавяцца ад оркападобных армій Пуціна і што гэтая цудоўная, багатая краіна стане вольнай», — напісаў ён.

Фота: Jamie Wiseman / The Daily Mail

Джонсан упэўнены, што «нішто і ніхто» не прымусіць украінцаў пайсці на кампраміс з расійскімі ўладамі.

«Гэтыя ўкраінцы стаміліся пасля чатырох гадоў пекла. Многія з іх раней атрымалі сур’ёзныя раненні і вярнуліся на поле бою са шнарамі ад аскепкаў на галовах і руках. Але прасоўванне Пуціна адбываецца павольна, як ледавік, і абыходзіцца надзвычай дорага — як у грашовым, так і ў чалавечым вымярэнні», — заўважыў палітык.

Фота: Jamie Wiseman / The Daily Mail

Экс-прэм’ер Вялікабрытаніі падкрэсліў, што калектыўны Захад мусіць перайсці ад палітыкі вербальнай падтрымкі і запэўніванняў да больш рашучай і канкрэтнай дапамогі.

«Мы чатыры гады паўтаралі банальныя фразы і запэўнівалі іх, што іх барацьба — гэта і наша барацьба. Мяркуючы па тым, што я бачыў, мы страшэнна не выконваем сваіх абяцанняў і не даем ім неабходнай дапамогі. Украінцы могуць перамагчы і перамогуць. Але наша маруджанне і боязь працягваюць выклікаць неймаверныя чалавечыя пакуты. Мы маем рацыю, калі кажам, што ўкраінцы змагаюцца за ўсіх нас — дык чаму, чорт бяры, мы да гэтага часу іх абдзяляем?» — рэзюмаваў ён.

Фота: Jamie Wiseman / The Daily Mail

Каментары да артыкула