Памёр вядомы інвестар Марк Мобіус
Пра смерць амерыканскага інвестара Марка Мобіуса паведамілі на ягонай старонцы ў LinkedIn. Яму было 89 гадоў.
Марк Мобіус. Фота: Simon Dawson/Bloomberg via Getty Images
Марк Мобіус лічыўся адным з самых вядомых спецыялістаў па інвестыцыях у краіны, якія развіваюцца — у Афрыцы, Азіі, Усходняй Еўропе і Лацінскай Амерыцы.
Яго ведалі як чалавека, які шмат падарожнічаў і вывучаў эканоміку розных краін не толькі па справаздачах, але і праз асабісты досвед. Менавіта гэта дапамагло яму раней за іншых заўважыць патэнцыял рынкаў, якія доўгі час заставаліся без увагі буйных інвестараў.
Прадстаўнікі інвестыцыйнай кампаніі Franklin Templeton адзначылі, што Мобіус змяніў погляд многіх людзей на міжнародныя інвестыцыі і натхніў цэлае пакаленне думаць шырэй пра магчымасці ў свеце.
Нарадзіўся Мобіус у 1936 годзе ў ЗША. Больш за 30 гадоў ён працаваў у Franklin Templeton, дзе кіраваў напрамкам інвестыцый у рынкі, што развіваюцца.
Ён стаў адным з першых буйных інвестараў, хто ўбачыў вялікі патэнцыял афрыканскага кантынента. У 2012 годзе ён стварыў спецыяльны фонд для інвестыцый у Афрыку, а пазней заснаваў уласную кампанію Mobius Capital Partners.
Многія ў фінансавым свеце лічаць, што ягоны ўплыў на міжнародныя інвестыцыі будзе адчувацца яшчэ доўгі час.
Чытайце таксама:
Трагічна загінуў былы брамнік зборнай Аўстрыі Аляксандр Манінгер