У Францыі прынялі закон аб вяртанні культурных каштоўнасцяў былым калоніям
Французскія дэпутаты прынялі закон, які спрашчае вяртанне культурных каштоўнасцяў, вывезеных з былых калоній. Нацыянальны сход Францыі аднагалосна падтрымаў гэты законапраект, а раней яго ўжо ўхваліў Сенат, паведамляе Euronews.
Фота: AP Photo/Michel Euler
Закон прадугледжвае больш простую працэдуру вяртання мастацкіх твораў і артэфактаў, вывезеных з былых французскіх калоній, напрыклад, Алжыра, Малі ці Беніна. Асаблівая ўвага надаецца прадметам, вывезеным у перыяд з 1815 да 1972 года — да ўступлення ў сілу міжнароднай канвенцыі аб ахове культурнай спадчыны.
Гэта рашэнне працягвае палітыку прэзідэнта Францыі Эмануэля Макрона, які яшчэ ў 2017 годзе заявіў пра неабходнасць вяртання афрыканскай культурнай спадчыны. Ён падкрэсліваў, што такія каштоўнасці не павінны знаходзіцца толькі ў еўрапейскіх музеях і прыватных калекцыях.
Паводле новага закона, краіны павінны афіцыйна звярнуцца з просьбай аб вяртанні і гарантаваць, што прадметы будуць захоўвацца і паказвацца грамадству. Пасля гэтага спецыяльная камісія будзе вырашаць, ці былі яны атрыманыя Францыяй незаконна або сілай.
Пры гэтым закон не закранае некаторыя катэгорыі каштоўнасцяў, напрыклад, вайсковыя прадметы, дзяржаўныя архівы і часткі археалагічных знаходак.
Нягледзячы на выніковую аднадушную падтрымку, падчас абмеркавання ўзнікалі спрэчкі наконт таго, на які перыяд павінны распаўсюджвацца новыя правілы.
У апошні час Францыя ўжо пачала вяртаць асобныя артэфакты, напрыклад, свяшчэнны барабан, вывезены з Кот-д’Івуара ў 1916 годзе.
Чытайце таксама:
Францыя вяртае Мадагаскару чэрап мясцовага караля, якому адсеклі галаву 128 гадоў таму