Францыя вяртае Мадагаскару чэрап мясцовага караля, якому адсеклі галаву 128 гадоў таму
Францыя прыняла рашэнне вярнуць Мадагаскару тры чалавечыя чэрапы з каланіяльнай эпохі. Паводле меркавання экспертаў, адзін з іх належаў малагасійскаму каралю Таэры, якому французскія вайскоўцы сцялі галаву ў XIX стагоддзі. У 1897 годзе чэрап караля вывезлі ў Францыю як ваенны трафей і размясцілі ў Парыжскім музеі прыродазнаўства разам са шматлікімі іншымі чалавечымі парэшткамі з вострава, паведамляе Euronews.
Міністарка культуры Францыі Рашыда Даці адзначыла, што гэтыя чарапы трапілі ў нацыянальныя музейныя калекцыі ў абставінах, якія абражалі чалавечую годнасць і былі вынікам каланіяльнага гвалту. У сваю чаргу, міністарка культуры Мадагаскара Валаміранці Дона Мара назвала вяртанне чэрапаў вельмі важным крокам і сімвалам новага этапу супрацоўніцтва паміж краінамі. Адсутнасць гэтых рэліквій у краіне на працягу 128 гадоў стала, маўляў, адкрытай ранай для народа.
Аб’яднаны навуковы камітэт пацвердзіў, што чэрапы належаць народу сакалава, а адзін з іх з вялікай верагоднасцю быў чэрапам караля Таэры. Прэзідэнт Францыі Эмануэль Макрон з часу свайго абрання ў 2017 годзе прызнаваў некаторыя «перагіны» ў палітцыі Францыі ў Афрыцы і ў 2024 годзе падчас візіту на Мадагаскар казаў пра імкненне «папрасіць прабачэння» за кроў і трагедыю каланіяльнай эпохі.
Парэшткі будуць вернутыя на востраў і пахаваныя ў нядзелю.
У апошнія гады Францыя актыўна імкнецца разабрацца з каланіяльным мінулым, вяртаючы парэшткі і культурныя каштоўнасці, але дагэтуль гэта складаны працэс. У 2023 годзе быў прыняты закон, які спрашчае рэпатрыяцыю чалавечых парэшткаў, а таксама закон аб вяртанні мастацкіх твораў, украдзеных нацыстамі. Плануецца, што ў будучыні падобныя законы дапамогуць вяртаць і культурныя каштоўнасці, скрадзеныя ў каланіяльны перыяд.
Цяпер чытаюць
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні5
Каментары