Іран зноў закрыў Армузскі праліў
«Трамп не выканаў сваіх абавязацельстваў, таму Армузскі праліў зноў закрыты, і для праходу патрабуецца згода Ірана», — Цэнтральнае камандаванне Ірана.
Фота: Shady Alassar/Anadolu via Getty Images
Таксама пра тое, што Іран вярнуў ваенны кантроль над Армузскім пралівам, заявіў прадстаўнік цэнтральнага штаба Узброеных сіл Ірана «Хазрат Хатам аль-Анбія».
Па яго словах, гэта звязана з тым, што амерыканцы «працягваюць займацца пірацтвам і марскім разбойніцтвам пад выглядам так званай блакады».
«Па гэтай прычыне кантроль над Армузскім пралівам вярнуўся да ранейшага стану, і гэты стратэгічны праліў знаходзіцца пад строгім кіраваннем і кантролем узброеных сіл», — гаворыцца ў паведамленні.
Тым часам некалькі нафтавых танкераў развярнуліся ў Персідскім заліве пасля спробаў прайсці праз Армузскі праліў.
Гаворка ідзе прынамсі пра шэсць суднаў, у тым ліку грэцкіія і індыйскія танкеры, якія рухаліся ў напрамку Армуза з раёнаў паблізу Дубая. Усе яны былі загружаныя нафтай, аднак у суботу раніцай, 18 красавіка, пачалі змяняць курс.