Кацярына Андрэева расказала, што ў калоніі ім паказалі частку прэс-канферэнцыі Калеснікавай, дзе яна дзякавала Лукашэнку
Яна заклікае не асуджаць Марыю за тыя словы. «Пастаўцеся больш далікатна да жанчын, якія столькі вытрымалі».
Кацярына Андрэева. Фота: LookByMedia
Журналістка і былая палітзняволеная Кацярына Андрэева расказала ў інтэрв'ю Аляксандру Івуліну, што ў калоніі ім паказвалі прэс-канферэнцыю з Марыяй Калеснікавай. Тая прэс-канферэнцыя адбылася ў Чарнігаве 14 снежня 2025 года, на наступны дзень пасля вызвалення і дэпартацыі партыі палітвязняў.
«Нам у калоніі не прамінулі паказаць тую частку прэс-канферэнцыі Марыі Калеснікавай, дзе яна казала «дзякуй» Аляксандру Лукашэнку.
Я хачу падкрэсліць, што я вельмі паважаю Машу за тое, што яна перанесла вялікія выпрабаванні, і ёй сядзелася значна цяжэй, чым многім іншым, і цяжэй, чым мне»,
— адзначыла Андрэева.
Відэа, якое паказалі жанчынам у калоніі, было апрацаванае, і пасля ўрыўка з прэс-канферэнцыі было напісана, што «цяпер людзі, якімі захапляліся пяць гадоў, сталі аб'ектамі жорсткай крытыкі». Менавіта такі акцэнт хацелі зрабіць сілавікі.
Кацярына заўважыла, што да былых палітвязняў трэба ставіцца пяшчотна і далікатна.
«Пастаўцеся больш далікатна да жанчын, якія столькі вытрымалі», — заклікае былая палітзняволеная журналістка.
Чытайце таксама:
Кацярына Андрэева вяртаецца ў журналістыку і анансавала ў хуткім часе першае відэаінтэрв’ю