Іран прапанаваў ЗША мірны план з 14‑ці пунктаў. Трамп будзе думаць

Як піша іранскае выданне Tashim, ЗША прапаноўвалі Ірану двухмесячнае спыненне агню, аднак Тэгеран настойвае на тым, што ўсе пытанні павінны быць вырашаныя на працягу 30 дзён і што асноўная ўвага павінна быць засяроджаная на «спыненні вайны», а не на падаўжэнні перамір'я.

Дональд Трамп. Фота: Chip Somodevilla / Getty Images

Вядома, што іранская прапанова ўключае наступныя пытанні:

• гарантыі бяспекі ад будучых атак;
• вывад войскаў ЗША з раёнаў, прылеглых да Ірана;
• зняцце марской блакады;
• размарожванне іранскіх актываў;
• выплата рэпарацый;
• зняцце санкцый;
• спыненне вайны на ўсіх франтах, уключаючы Ліван;
• новы механізм кіравання Армузскім пралівам.

Выданне дадае, што Тэгеран чакае афіцыйнага адказу ЗША на гэтыя прапановы.

Пазней прэзідэнт ЗША Дональд Трамп апублікаваў пост у сацсетках, адзначыўшы, што разгледзіць прапанову, аднак выказаў здагадку, што можа і не прыняць пагадненне.

«Неўзабаве я разгледжу план, які Іран толькі што нам даслаў, але не магу ўявіць, каб ён быў прымальным, паколькі яны яшчэ не заплацілі дастаткова высокую цану за тое, што зрабілі з чалавецтвам і светам за апошнія 47 гадоў», — напісаў Трамп у сваёй сацсетцы Truth Social.

Каментары да артыкула