ЗША скароцяць колькасць сваіх войскаў у Германіі на 5000 чалавек на фоне крыўды Трампа на Мерца
Іх забяруць на працягу паўгода-года.
Міністэрства абароны ЗША плануе вывесці 5000 вайскоўцаў з Германіі на фоне сваркі паміж прэзідэнтам ЗША Дональдам Трампам і канцлерам Германіі Фрыдрыхам Мерцам наконт вайны з Іранам, піша BBC.
Прадстаўнік Пентагона Шон Парнэл паведаміў, што загад аб вывадзе амерыканскіх войскаў паступіў ад міністра абароны ЗША Піта Хегсета.
«Гэтае рашэнне прынята пасля дбайнага аналізу дыслакацыі войскаў Міністэрства абароны ў Еўропе і ўлічвае патрэбы тэатра ваенных дзеянняў і ўмовы на месцах», — сказаў ён.
«Мы чакаем, што вывад войскаў будзе завершаны на працягу наступных шасці-дванаццаці месяцаў», — дадаў Парнэл.
У чацвер Трамп раскрытыкаваў Мерца за яго словы аб тым, што ЗША былі «прыніжаныя» іранскімі перамоўшчыкамі, і заявіў, што Мерц «жудасна дае рады сваёй працы» і мае «праблемы ўсіх відаў», у тым ліку па пытаннях іміграцыі і энергетыкі. Трамп таксама сказаў, што «вывучае і аналізуе магчымасць скарачэння колькасці войскаў у Германіі, і пастанова па гэтым пытанні будзе прынятая найбліжэйшым часам».
На снежань мінулага года на базах у Германіі былі дыслакаваныя больш за 36 тысяч вайскоўцаў ЗША — гэта найбуйнейшы амерыканскі кантынгент у Еўропе.
Многія з іх размешчаны на авіябазе «Рамштайн», якая знаходзіцца недалёка ад горада Кайзерслаўтэрн на паўднёвым захадзе Германіі.
Трамп таксама заявіў, што разглядае магчымасць вываду амерыканскіх войскаў з Італіі і Іспаніі.
Трамп, даўні крытык альянсу НАТА, не так даўно папракаў саюзнікаў за іх адмову ўдзельнічаць у аперацыях па аднаўленні працы Армузскага праліва.
У чацвер Трампа спыталі, ці разгледзіць ён таксама магчымасць вываду амерыканскіх войскаў з Італіі і Іспаніі, саюзнікаў ЗША па НАТА, на што прэзідэнт адказаў: «Верагодна, разгледжу — чаму б і не?»
«Італія нам нічым не дапамагла, а Іспанія паступіла жудасна», — дадаў ён, крытыкуючы іх рэакцыю на вайну ў Іране.
«Ва ўсіх выпадках яны казалі: «Я не хачу ўмешвацца»», — сказаў Трамп.
Амерыканскі кантынгент у Германіі з'яўляецца найбуйнейшым у Еўропе, у Італіі размешчаны каля 12 тысяч амерыканскіх вайскоўцаў, у Вялікабрытаніі — 10 тысяч. Толькі Японія мае больш буйную прысутнасць амерыканскіх войскаў.
Цяпер чытаюць
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне15
Каментары