На саміце ў Арменіі Ільхам Аліеў моцна паспрачаўся са старшынёй Еўрапарламента
На саміце Еўрапейскай палітычнай супольнасці ў Ерэване адбылася вострая публічная спрэчка паміж прэзідэнтам Азербайджана Ільхамам Аліевым і старшынёй Еўрапарламента Рабертай Метсолай, піша Euronews.
Прэзідэнт Азербайджана Ільхам Аліеў. Фота: azertag.az
Аліеў абвінаваціў Еўрапарламент у тым, што ён нібыта распаўсюджвае хлусню і дэзынфармацыю пра Азербайджан і занадта жорстка яго крытыкуе. Ён назваў такую пазіцыю «свайго роду апантанасцю» ягонай краінай і заявіў, што азербайджанскі парламент прыпыняе супрацоўніцтва з Еўрапарламентам.
Таксама ён сцвярджаў, што дэпутаты ЕС нібыта перашкаджаюць мірнаму працэсу паміж Арменіяй і Азербайджанам, які быў запушчаны пры пасярэдніцтве ЗША пасля завяршэння канфлікту вакол Нагорнага Карабаха.
У адказ Раберта Метсола выступіла ў абарону Еўрапарламента. Яна падкрэсліла, што гэта дэмакратычны інстытут, дзе рашэнні прымаюцца галасаваннем, і што крытыка з боку некаторых краін не зменіць прынцыпаў яго працы.
Як паведамляецца, выступленне Аліева не было загадзя запланавана, таму Метсола запатрабавала слова, каб адказаць на абвінавачванні.
Еўрапарламент раней прымаў рэзалюцыі з крытыкай сітуацыі ў Азербайджане, у тым ліку адносна Нагорнага Карабаха і правоў армянскага насельніцтва пасля канфлікту.
Чытайце таксама:
Ціханоўская прыехала на Саміт еўрапейскіх лідараў у Ерэван
На саміт у Арменію з'язджаюцца еўрапейскія лідары. Як адрэагуе Масква?
Аліеў заявіў пра падтрымку тэрытарыяльнай цэласнасці Украіны і гатоўнасць разам рабіць зброю