Стала вядома, што ў карціну Рэмбранта XVII стагоддзя нехта ўносіў змены

Рэстаўратары выявілі невядомыя змены на карціне XVII стагоддзя, якую прыпісваюць Рэмбранту. Падчас даследавання работы «Пусціце дзяцей прыходзіць да Мяне» высветлілася, што пазней нехта ўнёс істотныя праўкі ў арыгінальны выгляд карціны, піша The Guardian.

Фрагмент карціны «Пусціце дзяцей прыходзіць да Мяне». Фота: Sotheby's

У прыватнасці, адзін з цюрбанаў, надзетых на галовы людзей, быў перамаляваны ў традыцыйны галандскі капялюш. Таксама спецыялісты заўважылі, што фігура аднаго з дзяцей была часткова прыкрытая адзеннем, хаця першапачаткова яна магла быць намалявана аголенай.

Паводле экспертаў, гэтыя змены, верагодна, зрабіў іншы мастак, каб зрабіць сюжэт больш «прымальным» для тагачасных гледачоў і прыбраць элементы, якія маглі выклікаць спрэчкі.

Карціна была знойдзена ў 2014 годзе на нямецкім аўкцыёне, дзе яе спачатку лічылі працай невядомага нідэрландскага мастака XVII стагоддзя. Цяпер, пасля экспертызы, яе прыпісваюць Рэмбранду і рыхтуюць да продажу на аўкцыёне Sotheby’s з ацэнкай у некалькі мільёнаў фунтаў стэрлінгаў.

Даследчыкі адзначаюць, што першапачатковая версія твору магла быць больш разнастайнай і адкрытай у сэнсе адлюстравання людзей розных сацыяльных і культурных груп, што адпавядала ідэям талерантнасці, характэрным для часткі галандскага грамадства таго часу.

Каментары да артыкула