Участак праспекта Дзяржынскага ў Мінску часткова перакрыюць

У Мінску часова абмяжуюць рух транспарту па няцотным баку праспекта Дзяржынскага ў сувязі з рамонтнымі работамі. Пра гэта паведамілі ў Дзяржаўтаінспекцыі сталіцы.

Здымак ілюстрацыйны. Фота: Wikimedia Commons

Работы будуць праводзіцца на ўчастку ад вуліцы Касманаўтаў да вуліцы Гурскага. Плануецца замена асфальтабетоннага пакрыцця, а рамонт будзе праходзіць у некалькі этапаў.

З 6 па 11 жніўня кожны дзень з 20:00 да 7:00 дарожныя службы будуць фрэзаваць старое пакрыццё. На гэтым этапе поўных абмежаванняў для руху не будзе.

З 10 па 14 жніўня ў начны час — з 22:00 да 7:00 — спецыялісты пачнуць укладваць ніжнія слаі новага асфальту. Гэтыя работы таксама будуць выконвацца без закрыцця руху.

Частковае абмежаванне руху транспарту, за выключэннем грамадскага і спецыяльнага, увядуць з 23:00 14 жніўня да 01:30 15 жніўня. У гэты час пачнецца ўкладка верхняга пласта дарожнага пакрыцця.

Поўнасцю рух усіх відаў транспарту на ўчастку праспекта Дзяржынскага ад вуліцы Касманаўтаў да вуліцы Гурскага будзе перакрыты з 01:30 15 жніўня да 12:00 16 жніўня.

ДАІ рэкамендавала кіроўцам загадзя ўлічваць гэтыя абмежаванні і выбіраць іншыя маршруты руху.

Каментары да артыкула