Пачаў працу ў Беларусі новы павераны ў справах Вялікабрытаніі
31 ліпеня новапрызначаны павераны ў справах Вялікабрытаніі ў Беларусі Уільям Лангхёрст перадаў копіі даверчых грамат міністру замежных спраў Максіму Рыжанкову.
Уільям Лонгхёрст і Максім Рыжанкоў. Фота: МЗС Беларусі
Падчас сустрэчы, як паведамляецца, бакі абмеркавалі цяперашні стан адносін паміж Беларуссю і Вялікабрытаніяй, а таксама магчымасці для іх далейшага развіцця. У беларускім МЗС заявілі, што размова прайшла ў атмасферы даверу і ўзаемаразумення.
Уільям Лангхёрст працуе ў дыпламатычнай сістэме больш за 35 гадоў. За сваю кар'еру ён працаваў у брытанскіх дыпламатычных прадстаўніцтвах у Японіі, Паўднёвай Карэі, Камбоджы, Сербіі і Швейцарыі, а таксама ў пастаянным прадстаўніцтве Вялікабрытаніі пры ААН у Нью-Ёрку.
У 2019—2024 гадах Лангхёрст быў намеснікам кіраўніка дыпламатычнай місіі Вялікабрытаніі ў Швейцарыі. Адначасова ён займаў пасаду генеральнага консула Вялікабрытаніі ў Швейцарыі і Ліхтэнштэйне.
Да прызначэння Лангхёрста абавязкі часовага кіраўніка брытанскай дыпламатычнай місіі ў Беларусі выконваў Дэвід Уорд. Паўнавартаснага пасла ў Беларусі Вялікабрытанія цяпер не мае.
Чытайце таксама:
Мяняецца часовы павераны ў справах Італіі ў Беларусі
Швейцарыя памяняе свайго пасла ў Беларусі
Вялікабрытанія прызначыла новага часовага паверанага ў Беларусі