ФІФА хоча павялічыць колькасць зборных на мундыялі да 64‑х
ФІФА разглядае магчымасць павелічэння колькасці ўдзельнікаў чэмпіянату свету па футболе з цяперашніх 48 да 64 зборных. Змены могуць быць уведзеныя ўжо на турніры 2030 года.
Прэзідэнт ФІФА Джані Інфанціна на чэмпіянаце свету 2026 года. Фота: AP Photo / Andre Penner
Паводле дакумента, з якім азнаёмілася агенцтва Reuters, ФІФА плануе прыцягнуць незалежную арганізацыю, якая павінна ацаніць, як павелічэнне колькасці камандаў паўплывае на фармат спаборніцтваў, яго арганізацыю і іншыя важныя аспекты правядзення чэмпіянату свету.
Пытанне аб магчымым пашырэнні ўжо абмяркоўваецца ўнутры ФІФА. Амерыканскі тэлеканал ESPN таксама паведаміў, што арганізацыя разглядае розныя варыянты далейшага развіцця сусветнага першынства.
З 2026 года ў фінальнай частцы чэмпіянату свету ўдзельнічаюць 48 нацыянальных зборных. Калі новая прапанова будзе ўхваленая, на турніры 2030 года іх колькасць можа вырасці да 64.
Чэмпіянат свету 2030 года пройдзе ў Іспаніі, Партугаліі і Марока. Канчатковае рашэнне аб магчымым пашырэнні турніру ФІФА плануе прыняць пасля правядзення даследавання і адпаведных кансультацый.
Чытайце таксама:
УЕФА аднагалосна вырашыў байкатаваць турніры ФІФА, калі рэалізуюцца планы Інфанціна
Прэзідэнт ФІФА хоча падзяліцца правамі на мундыяль з блізкімі да Трампа прыватнымі інвестарамі
Даходы ФІФА ад правядзення чэмпіянату свету 2026 года складуць рэкордныя $15 млрд