У Германіі выставілі на аўкцыён карціну Фердынанда Рушчыца

На нямецкім Mehlis Auktionen з'явіўся цікавы лот, звязаны з Беларуссю. Гэта карціна «Дрэва каля сажалкі», аўтарам якой пазначаны славуты мастак родам з нашых земляў Фердынанд Рушчыц. 

Фота: mehlis.eu

На наяўнасць гэтага лота звярнуў увагу даследчык старажытнай беларускай графікі і картаграфіі і кнігавыдавец Ілля Андрэеў, які цяпер жыве ў Кракаве. Ён піша ў фэйсбуку:

«З гэтай карцінай цікавая сітуацыя. Правенанс незразумелы — калі б было што напісаць, абавязкова б напісалі. Карціна не датаваная, але падпісаная F. Ruszczyc Bohdanow, можна меркаваць, што напісаная ў нашым Багданаве.

Фота: mehlis.eu

Таму пытанне аўтэнтычнасці застаецца, бо падробкі сустракаюцца, і іх не мала. Больш за тое, такі аўкцыённы дом, як гэты, ніякіх гарантый не дасць.

Фота: mehlis.eu

Тым не менш, праца выглядае праўдзіва. Не эцюд, не нешта з «перыферыйных абшараў» творчасці. Вялікі фармат, на палатне. Сапраўды музейная рэч.

Фота: mehlis.eu

Але і кошт будзе… Цяжка ўявіць, хто мог бы канкураваць з польскімі калекцыянерамі, акрамя беларускіх айцішнікаў. Цікава, ці даспеюць калі-небудзь».

Фота: mehlis.eu

Першаснай цаной для гэтай карціны вызначана 1000 еўра, але ў працэсе таргоў яна відавочна павялічыцца.

Фердынанд Рушчыц (1870—1936) — вядомы мастак-пейзажыст, графік і сцэнограф. Ён нарадзіўся ў Багданаве каля Валожына, там стварыў свае галоўныя карціны і там пахаваны. Менавіта беларускія краявіды сталі асновай многіх яго твораў.

Каментары да артыкула