Пуцін дазволіў перадаваць дзяржаве аб'екты, неабароненыя ад дронаў
Прэзідэнт Расіі Уладзімір Пуцін падпісаў указ, які дазваляе ўводзіць часовае дзяржаўнае кіраванне на аб'ектах крытычнай інфраструктуры Расіі, уладальнікі якіх не прынялі дастатковых мер для іх абароны, у тым ліку ад атак беспілотнікаў.
Фота ілюстрацыйнае
Гаворка ідзе пра прадпрыемствы паліўна-энергетычнага комплексу, прамысловасці, сувязі, ЖКГ, транспартнай і лагістычнай сфераў, а таксама пра іншыя аб'екты, важныя для бяспекі краіны, эканамічнай стабільнасці і жыццядзейнасці насельніцтва.
Згодна з указам, у часовае кіраванне дзяржаве могуць перадавацца нерухомасць, каштоўныя паперы, долі ў статутным капітале і маёмасныя правы арганізацый і фізічных асоб, якія валодаюць такімі аб'ектамі. Кіраваць імі будзе Расмаёмасць альбо іншая прызначаная расійскімі ўладамі структура.
Такі механізм плануюць выкарыстоўваць у сувязі з ростам пагрозы для расійскай крытычнай інфраструктуры падчас вайны. Раней расійскі бізнэс звяртаўся да ўладаў з просьбай вызначыць зразумелыя схемы фінансавання абароны прадпрыемстваў ад беспілотнікаў.
У апошнія месяцы ў Расіі пачасціліся атакі ўкраінскіх дронаў на прамысловыя і лагістычныя аб'екты, у тым ліку склады буйных маркетплэйсаў і нафтаперапрацоўчыя прадпрыемствы. Расійскія ўлады ўжо дазволілі некаторым кампаніям набываць сродкі для абароны ад БПЛА, уключаючы радыёлакацыйнае абсталяванне, сродкі радыёэлектроннай барацьбы і зенітныя сістэмы.
Чытайце таксама:
Пяскоў: Украіна і далей будзе адчуваць адказы Расіі на ўдары па складах Ozon і іншай інфраструктуры
Пуцін: Украіна сама выпусціла джына з бутэлькі. Атрымайце адказ
«Украіна іншая і свайго не аддасць». Зяленскі павіншаваў краіну з Днём незалежнасці