«Украіна іншая і свайго не аддасць». Зяленскі павіншаваў краіну з Днём незалежнасці
У Дзень незалежнасці прэзідэнт Украіны Уладзімір Зяленскі заявіў, што галоўным здабыткам незалежнай Украіны сталі яе людзі — тыя, хто ўзяў на сябе адказнасць за краіну і ўжо больш за чатыры гады поўнамаштабнай вайны не дазваляе Расіі яе скарыць.
Паводле Зяленскага, Расія памылілася, калі ў прагназаванні вайны брала ў разлік толькі ўкраінскія рэсурсы, тэхніку і склады.
«Вораг лічыў нашы рэсурсы, склады, нашу тэхніку, але не ўлічыў галоўнага: людзей — галоўны здабытак Незалежнасці Украіны», — сказаў прэзідэнт Украіны.
Ён падкрэсліў, што менавіта ўзаемная падтрымка ўкраінцаў дазваляе краіне трымацца.
Зяленскі асобна падзякаваў украінскім вайскоўцам і назваў іх «найлепшай арміяй Еўропы».
«Вы не аддаяце наш Данбас, вы не аддаяце Украіну. Вы — найлепшыя абаронцы і абаронцы. Вы — найлепшая армія Еўропы. Кропка».
Прэзідэнт Украіны адзначыў, што ўкраінская армія трымаецца не толькі на тэхніцы і ваенных дактрынах, але і на чалавечай адвазе: «Мы захавалі пяшчотнасць, хоць маглі азвярэць».
На думку Зяленскага, менавіта гэта адрознівае Украіну ад Расіі і робіць яе мацнейшай:
«Мы не ачарсцвелі ўсёй краінай, мы ўсёй краінай змагаемся, смяёмся і плачам усёй краінай, любім усёй краінай. І гэтым мы ў сто разоў мацнейшыя за Расію».
Асобна прэзідэнт Украіны гаварыў пра развіццё ўкраінскай абароннай прамысловасці. Паводле яго, Украіна ўжо масава выкарыстоўвае наземныя рабатызаваныя комплексы, марскія дроны і дальнабойную зброю, але гэтага недастаткова — вытворчасць неабходна павялічваць.
«Рэальна наш АПК сёння — волат, які 24/7 гартуе Незалежнасць. І мы павінны рабіць больш».
Зяленскі заявіў, што Украіна павінна знайсці рашэнне і супраць расійскага балістычнага тэрору.
Ён нагадаў, што ў пачатку вайны масавыя атакі «Шахедамі» здаваліся амаль невырашальнай праблемай, але цяпер Украіна збівае больш за 90% такіх беспілотнікаў.
«Украіна дзеля гэтага робіць усё. І зробіць. Бо ўжо не раз даказвала: наша ўпартасць ім не па калібры», — сказаў ён.
Асноўная палітычная частка выступу была прысвечаная Расіі і магчымым перамовам. Зяленскі заявіў, што Крамлю нельга дазволіць прымусіць Украіну аддаць Данбас у абмен на абяцанне хуткага заканчэння вайны:
«Мы не дамо ім перахапіць ініцыятыву, падмануць Еўропу і ўвесь свет, што трэба проста аддаць Данбас, і ўсё хутка скончыцца».
Ён падкрэсліў, што Украіна не верыць расійскім абяцанням і не збіраецца адмаўляцца ад сваіх тэрыторый:
«Ілюзій няма. Веры ім няма».
Паводле Зяленскага, Расія не дэманструе сапраўднага жадання міру, а рыхтуецца да далейшай мабілізацыі.
«Пуцін спадзяецца, што мы стаміліся. Мы ведаем, што ён смяротны. Ён ніколі нас не разумеў. Цяпер у яго не будзе часу. Вы хацелі забраць усю нашу Украіну, усю нашу зямлю, але ўзамен страцілі свае нафтаперапрацоўчыя заводы, свой флот, свае прыбыткі і ўсё сваё пакаленне, якое вы паклалі ў мясарубку. Вы хацелі, каб нас сцерлі з карты, цяпер вас няма ў міжнародным парадку дня будучай цывілізацыі. Дваццаць сем гадоў кіраўнік Расіі кажа пра веліч, а Расія стаіць у чэргах за бензінам. Мы павінны быць адзінымі і ціснуць на іх. Украіна, Еўропа, Амерыка, свет», — сказаў ён.
Зяленскі таксама звярнуўся да ЗША, Еўропы і Кітая. Ён заявіў, што Украіна не просіць партнёраў ваяваць замест яе, але патрабуе даць ёй усё неабходнае для спынення вайны.
«Мы не просім ваяваць за нас. Дайце Украіне ўсё, каб спыніць гэтую вайну, каб спыніць яе хутчэй, чым Пуцін паспее пачаць наступную».
Еўропу ён заклікаў быць больш адзінай і смелай, а Кітай — выкарыстоўваць свой уплыў, каб стрымліваць Расію.
«Кітай больш не павінен маўчаць. Калі хтосьці апранаецца ў матроску і кепку і, дрэнна вымаўляючы некаторыя словы, кажа пра ядзерны ўдар, Кітай павінен адрэагаваць, павінен астудзіць пыл. Кітай павінен даказаць свае амбіцыі быць адным з сусветных лідараў, і не толькі эканамічна і тэхналагічна, але і цывілізацыйна — даць зразумець, што ніякія дыктатары не павінны пагражаць планеце сваімі старымі боегалоўкамі», — сказаў ён.
Зяленскі адзначыў, што Украіна ўжо не з'яўляецца дзяржавай, якая толькі просіць дапамогі.
Гаворачы пра 35 гадоў незалежнасці, прэзідэнт падкрэсліў, што незалежнасць Украіне ніхто не падарыў — яе аднавілі і за яе давялося змагацца.
24 лютага 2022 года, паводле Зяленскага, вайна паставіла перад украінцамі пытанне, хто яны і ці здольныя абараніць сваю дзяржаву: «І я дзякую мільёнам украінцаў, якія далі і даюць адказ на карысць Украіны, на карысць Незалежнасці», — сказаў ён.
Зяленскі прызнаў, што ўкраінцы стаміліся ад вайны і вельмі хочуць міру, але не гатовыя здацца:
«Украіна, безумоўна, вельмі хоча міру, але не гатовая проста ўзяць і здацца».
Ён таксама нагадаў, што многія прагнозы адносна Украіны за апошнія 35 гадоў не спраўдзіліся: казалі, што дзяржава не адбудзецца, што яна не вытрымае крызісаў, а ў першыя дні поўнамаштабнага ўварвання — што пратрымаецца лічаныя дні:
«А мы трымаемся ўвесь гэты час — час вайны за Незалежнасць».
Завяршаючы выступ, Зяленскі заявіў, што і дзень заканчэння вайны абавязкова настане. Паводле яго, Украіна павінна выйсці з гэтай вайны захаванай, свабоднай і незалежнай:
«За гэта і змагаемся. За гэта і стаім. З верай адно ў аднаго, у нашы Сілы абароны, у нашу дзяржаву».
Каментары
Ён смяротны, а абаронцы Украіны не? і яны не стаміліся?