Сваякі апазналі целы загінулых у Кыргызстане альпіністаў
Сваякі апазналі целы двух альпіністаў, якія загінулі падчас узыходжання на пік Курумды ў Кыргызстане. Целы спусцілі з гор і даставілі ў морг горада Ош, піша Sputnik.
Фота Аляксандра Смірнова
Адзін з загінулых — 43‑гадовы грамадзянін Беларусі Максім Палянскі, другі — 37‑гадовы грамадзянін Літвы Сяргей Рубцоў. Пасля апазнання іх целы плануюць адправіць на радзіму.
Цела трэцяга ўдзельніка групы — 60‑гадовага беларуса Мікалая Свірыдава — пакуль застаецца ў гарах. Яго пошукі прыпынілі, паколькі далейшая выратавальная аперацыя стала занадта небяспечнай для саміх ратавальнікаў.
Група, у якую ўваходзілі два беларусы і літоўскі альпініст, перастала выходзіць на сувязь 4 жніўня пасля ўзыходжання на пік Курумды вышынёй 6612,5 метра.
Узыходжанне на гэтую вяршыню адносіцца да найвышэйшай катэгорыі складанасці і патрабуе ад альпіністаў сур'ёзнай фізічнай і тэхнічнай падрыхтоўкі. Упершыню Курумды скарылі толькі ў 2001 годзе пасля некалькіх няўдалых спробаў.
Чытайце таксама:
Пачалі спуск целаў двух альпіністаў, якія загінулі ў Кыргызстане
«Ішлі ў адной звязцы». Што адбылося з беларусамі ў гарах Кыргызстана