«Мільён дзякуй усім». Павел Белавус напісаў першы пасля вызвалення пост у фэйсбуку

Стваральнік symbal.by Павел Белавус, які выйшаў на волю 15 верасня разам з яшчэ 24‑ма беларускімі палітвязнямі, напісаў у фэйсбуку першы пасля вызвалення пост, у якім падзякаваў усім, хто яго ўвесь час зняволення падтрымліваў.

Павел Белавус. Фота: facebook.com/belavus

«Вось і прайшло амаль 5 гадоў. Прывітанне, сябры!

У першую чаргу хачу сказаць мільён дзякуй усім, хто пісаў, дапамагаў, хваляваўся, падтрымліваў, падбадзёрваў, натхняў, верыў, быў побач у складаныя моманты і даваў надзею мне верыць, што пра мяне памятаюць і мяне не пакінуць там на ўсе 13 гадоў.

За гэтыя гады ў розных камерах і розных установах я сустрэў неверагодную колькасць цудоўных людзей, якія падтрымлівалі мяне і якіх падтрымліваў я. Некаторыя з іх ужо на волі, а многія яшчэ сядзяць.

І хоць здаецца цяжка, здаецца што надакучыла, але варта памятаць, што гэтыя людзі, як і я, кожны дзень гадамі жывуць надзеяй, што пра іх не забыліся, што ім дапамогуць хутчэй вызваліцца.

Таму яшчэ адзін вялізны дзякуй усім валанцёрам і арганізацыям, якія штодзённа працягваюць гэтую цяжкую і важную працу», — напісаў Павел Белавус.

Каментары да артыкула