БЕЛ Ł РУС

Хочаце схуднець? Магчыма, вам трэба есці больш, а не менш

18.10.2026 / 07:00

Ідаля Салавей

Звычайна тыя, хто хоча схуднець, пачынаюць менш есці. Але некаторыя спецыялісты па харчаванні прапануюць іншы падыход. Чаму гэта можа дапамагчы скінуць вагу, тлумачыць The Independent.

Фота: Vecteezy

На першы погляд, парада есці больш, каб схуднець, супярэчыць логіцы: калі чалавек атрымлівае больш калорый, чым расходуе, ён набірае вагу. Аднак прафесар Універсітэта Паўднёвай Каліфорніі Вальтэр Лонга, які даследуе праблемы даўгалецця, раіць тым, хто хоча схуднець, не менш есці, а больш. Галоўнае — правільна выбіраць прадукты.

Як тлумачыць спецыяліст, ежа, багатая на клятчатку і бялок, лепш насычае і дапамагае даўжэй не адчуваць голаду. Да таго ж гародніна і садавіна звычайна маюць невысокую каларыйнасць. Таму можна з'есці вялікую порцыю такой ежы і атрымаць менш калорый, чым ад некалькіх салодкіх перакусаў.

Пэўныя прадукты таксама спрыяюць выпрацоўцы ў арганізме гармона GLP-1, які ўдзельнічае ў рэгуляванні апетыту. Менавіта на дзеянні гэтага гармону заснаваны эфект некаторых сучасных прэпаратаў для зніжэння вагі, у тым ліку «Аземпіку».

Чаму лепш дадаваць, а не забараняць

Такі падыход працуе яшчэ і дзякуючы «эфекту выцяснення». Калі чалавек пачынае есці больш садавіны, гародніны, бабовых і суцэльназерневых прадуктаў, яны паступова займаюць месца менш карыснай ежы.

Напрыклад, даследаванні паказваюць, што дзеці, якім раяць есці больш садавіны, часам крыху худнеюць. Рэч у тым, што садавіна не проста дадаецца да ранейшага меню, а часткова замяняе іншыя прадукты.

Гэта адна з прычын, чаму такі падыход можа быць больш прадукцыйным за жорсткія дыеты. Пастаянныя забароны і абмежаванні часта пакідаюць чалавека галодным і незадаволеным, таму доўга прытрымлівацца іх складана.

Да прадуктаў, якія варта часцей уключаць у рацыён, спецыялісты адносяць гародніну, садавіну, фасолю, сачавіцу, суцэльныя злакі і нятлустыя крыніцы бялку.

Важна не толькі харчаванне, але і рух

Але нават правільна складзены рацыён — толькі частка справы. Не менш важна, наколькі актыўны чалавек у паўсядзённым жыцці.

Даследаванне, апублікаванае ў 2019 годзе, паказала, што апетыт лепш рэгулюецца, калі чалавек і больш есць, і больш рухаецца. Фізічная актыўнасць дапамагае кантраляваць вагу не толькі дзякуючы спальванню калорый, але і праз уплыў на адчуванне голаду і сытасці.

Пры гэтым арганізм чалавека прыстасаваны да эканоміі энергіі. Калі доўга і істотна абмяжоўваць харчаванне, ён можа зніжаць яе расход, што ўскладняе пахудзенне. Таму спалучэнне сядзячага ладу жыцця і жорсткай дыеты не заўсёды дае ўстойлівы вынік.

Чытайце таксама:

Выбіраем здаровыя прадукты разам з фітнес-трэнерам

Ці сапраўды «экалагічна чыстыя» прадукты больш карысныя для здароўя?

Навукова абгрунтаваныя стратэгіі, якія сапраўды дапамогуць вам есці менш

Каментары да артыкула