Скончыў жыццё самагубствам сын вядомага расійскага апазіцыйнага палітыка

Сын расійскага апазіцыйнага палітыка Дзмітрыя Гудкова Іван скончыў жыццё самагубствам. Пра смерць старэйшага сына паведаміў сам палітык.

Іван Гудкоў. Фота з фэйсбук-старонкі Дзмітрыя Гудкова

«У нашай сям’і адбылося вялікае гора — наш з Соняй старэйшы сын Іван добраахвотна пайшоў з жыцця. На працягу многіх гадоў ён змагаўся з цяжкімі ўнутранымі праблемамі, якія, на жаль, так і не ўдалося пераадолець», — напісаў Гудкоў.

Вядома, што Івану Гудкову было 22 гады. 

46‑гадовы Дзмітрый Гудкоў — расійскі апазіцыйны палітык, журналіст паводле адукацыі, сын былога дэпутата Дзяржаўнай думы Расіі Генадзя Гудкова. У 2011—2016 гадах ён і сам быў дэпутатам Дзярждумы, дзе выступаў супраць палітыкі Крамля. У 2018 годзе разам з Ксеніяй Сабчак удзельнічаў у стварэнні Партыі перамен і пазней яе ўзначальваў.

У чэрвені 2021 года пасля ператрусу і затрымання ў межах крымінальнай справы Гудкоў з'ехаў з Расіі. Пасля пачатку поўнамаштабнай вайны Расіі супраць Украіны далучыўся да Антываеннага камітэта Расіі. У лютым 2023 года расійскія ўлады ўнеслі яго ў рэестр «замежных агентаў», а ў жніўні 2024 года завочна асудзілі на восем гадоў пазбаўлення волі паводле абвінавачання ў распаўсюдзе «фэйкаў» пра расійскую армію. Цяпер Гудкоў жыве за межамі Расіі і працягвае апазіцыйную дзейнасць.

Каментары да артыкула