Яшчэ каля 400 гектараў зямлі на Гомельшчыне больш не лічацца радыеактыўнымі

Каля 374 гектараў зямлі ў пяці раёнах Гомельскай вобласці выключылі са спісу радыяцыйна небяспечных тэрыторый зоны адчужэння. Адпаведную пастанову падпісаў прэм’ер-міністр Беларусі Аляксандр Турчын.

Здымак ілюстрацыйны. Фота: «Наша Ніва»

Змены закранаюць участкі ў Брагінскім, Буда-Кашалёўскім, Веткаўскім, Мазырскім і Чачэрскім раёнах. Цяпер гэтыя землі можна будзе зноў выкарыстоўваць у гаспадарчых мэтах. Пры гэтым прадукцыя, вырабленая на іх, як запэўніваецца, будзе праходзіць радыяцыйны кантроль.

Пастанова ўступае ў сілу з дня яе прыняцця.

У Беларусі ўжо некалькі гадоў праводзяць перагляд тэрыторый, якія раней прызналі радыяцыйна небяспечнымі. У красавіку 2026 года са зоны адчужэння выключылі больш за 940 гектараў зямлі ў дзесяці раёнах Гомельскай вобласці.

Адначасова некаторыя ўчасткі ў Брагінскім і Веткаўскім раёнах, агульная плошча якіх складае каля 378,7 гектара, наадварот, прызналі радыяцыйна небяспечнымі, дазволіўшы толькі абмежаванае гаспадарчае выкарыстанне.

Каментары да артыкула