Ціханоўская правяла перамовы з прэзідэнтам Румыніі
4 лістапада ў Бухарэсце Святлана Ціханоўская сустрэлася з прэзідэнтам Румыніі Нікушорам Данам. Перамовы адбыліся ў палацы Катрачэнь падчас візіту беларускай дэмакратычнай лідаркі ў Румынію.
Фота: прэс-служба Святланы Ціханоўскай
Бакі абмеркавалі рэгіянальную бяспеку і падтрымку Украіны, узмацненне ціску на рэжым Лукашэнкі, а таксама дапамогу беларусам за мяжой у пытаннях легалізацыі і адукацыі. Асобна гаворка ішла пра падтрымку незалежных медыя і грамадзянскай супольнасці, перспектывы дэмакратычных пераўтварэнняў у Беларусі і супрацоўніцтва на міжнародным узроўні.
Значную ўвагу падчас сустрэчы бакі надалі вызваленню палітвязняў і падтрымцы людзей, якія пацярпелі ад рэпрэсій. Ціханоўская прапанавала Румыніі далучыцца да Міжнароднага гуманітарнага фонду дапамогі рэпрэсаваным беларусам, а таксама разгледзець магчымасць прызначэння спецыяльнага прадстаўніка для кантактаў з беларускімі дэмакратычнымі сіламі.
Ціханоўская падзякавала Румыніі за падтрымку беларусаў і адзначыла, што для дэмакратычных сіл важна, каб Беларусь заставалася ў цэнтры ўвагі еўрапейскіх партнёраў. Паводле яе слоў, дэмакратычная і незалежная Беларусь адпавядае інтарэсам бяспекі ўсёй Еўропы, у тым ліку Румыніі і Чарнаморскага рэгіёна.
Чытайце таксама:
Ціханоўская пра ліст часткі былых палітвязняў: Такія адкрытыя лісты трэба пісаць Лукашэнку
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна
Ціханоўская: Беларусь — гэта не Расія. І беларусы — гэта не Лукашэнка