У крымскім СІЗА загінула выкладчыца харкаўскай моўнай школы, якая прыехала да бацькоў
У анексаваным Расіяй Крыме ў следчым ізалятары памерла выкладчыца з Харкава, сузаснавальніца мясцовай моўнай школы «Прафесіянал» Аляксандра Казаравіцкая (Калеснікава). Пра яе смерць паведаміла адміністрацыя навучальнай установы, заявіўшы, што жанчыну «забіла Расія», піша выданне «Медуза».
Аляксандра Казаравіцкая. Фота з сацыяльных сетак
Улетку 2026 года Казаравіцкая прыехала ў Севастопаль, каб дапамагчы бацькам, якія там жылі, прадаць кватэру і пераехаць у Турцыю. Там яна сама разам з мужам жыла апошнім часам.
Падчас знаходжання ў Крыме жанчыну затрымалі. Па словах яе калег, падставай стала знойдзеная перапіска з валанцёрам, якая вялася яшчэ з пачатку поўнамаштабнага расійскага ўварвання ва Украіну.
Пасля затрымання выкладчыцу на тры месяцы змясцілі ў адзіночную камеру следчага ізалятара, дзе яна чакала суда. Паводле звестак яе калег, расійскія ўлады назвалі прычынай смерці самагубства.
Журналісты і праваабаронцы мяркуюць, што Казаравіцкая памерла ў адным з двух следчых ізалятараў Сімферопаля. Жанчыне было 44 гады, у яе засталіся муж і дачка.