У Веткаўскім раёне адкрылі рух па новым мосце праз Сож
На аўтамабільнай дарозе Р30 у Веткаўскім раёне адкрылі новы мост праз раку Сож. Яго будаўніцтва закончылі на восем месяцаў раней за запланаваны тэрмін, паведаміла прэс-служба Гомельскага аблвыканкама.
Фота: gomel_region_gov
Стары мост на дарозе Гомель — Ветка — Чачэрск — Ямнае быў пабудаваны ў 1968 годзе. Абследаванне паказала, што капітальна адрамантаваць яго апорныя канструкцыі з улікам сучасных патрабаванняў немагчыма.
У красавіку 2023 года Аляксандр Лукашэнка падчас працоўнай паездкі ў Веткаўскі раён даручыў у найкарацейшыя тэрміны пабудаваць новую пераправу. Работы пачаліся ў верасні 2024 года і вяліся вахтавым метадам без выхадных.
Даўжыня новага моста складае каля 540 метраў, шырыня праезнай часткі перавышае 10 метраў. Ён мае 13 пралётаў: шэсць металічных агульнай вагой 1148,2 тоны і сем жалезабетонных. Дарожнае пакрыццё выкананае з асфальтабетону.
Цяпер будаўнікі прыступяць да разборкі старой пераправы. На час будаўніцтва яе ўмацавалі, каб гарантаваць бяспечную эксплуатацыю.
Чытайце таксама:
Частку Лоеўскага раёна перададуць у склад Гомельскага
У Навагрудскім раёне закрываюць на цэлы год мост цераз Нёман
Новыя магістралі і мост цераз Дразды. Якой будзе дарожная сетка на поўначы Мінска