Трамп прапанаваў Дане Уайту, босу UFC, стаць яго новым прэс-сакратаром

А ў памочнікі паклікаць шэсць байцоў, у тым ліку Хабіба Нурмагамедава.

Дональд Трамп і Дана Уайт. Фота: AP Photo / Mark Schiefelbein

Дональд Трамп напісаў у сваёй сацсетцы Truth Social, што прапануе пасаду прэс-сакратара Белага дома Дане Уайту, кіраўніку UFC. Ён назваў Уайта «жорсткім байцом і воінам». Трамп таксама папрасіў яго прывесці з сабой шасцёх байцоў UFC у якасці памочнікаў, каб абараняць адміністрацыю ад «шалёных левых», піша Guardian.

Да допісу былі прыкладзеныя выявы. Сярод іх згенераваная ШІ выява Уайта ля прэзідэнцкай пячаткі і фота шасці байцоў: Іслама Махачава, Хабіба Нурмагамедава, Джасціна Гэтджы, Даніэля Кармье, Аманды Нуньес і Кайлы Харысан.

Незразумела, ці гэта рэальны план, ці спроба адцягнуць увагу ад паразы рэспубліканцаў на выбарах.

CNN паведаміла, што Уайт адмовіўся, а адзін з памочнікаў Трампа назваў прапанову жартам. Пасля гэтага Уайт апублікаваў у Instagram сваё фота ў брыфінг-зале Белага дома з подпісам «Наперад, да новага раздзела». На прэс-канферэнцыі ў Лондане ён сказаў, што ляціць у Вашынгтон і ў панядзелак сустрэнецца з Трампам. Ці прыме пасаду, ён не сказаў.

У чэрвені Уайт арганізаваў бой UFC у Белым доме да 80‑годдзя Трампа. Ён актыўна падтрымліваў Трампа ў 2024 годзе.

Ужо тры тыдні ў Белага дома няма прэс-сакратара. Папярэдняя кандыдатка Кэці Закарыя вымушана была сысці.

Каментары да артыкула