Новая прэс-сакратарка Трампа правяла першы брыфінг — і ў Белым доме ўжо сумняваюцца, ці доўга яна пратрымаецца
Кэці Закарыя на першым брыфінгу пераблытала прэзідэнта з мужам, скончыла брыфінг праз 14 хвілін і не змагла адказаць на пытанне пра перадачу разведданых Украіне. Некаторыя супрацоўнікі Белага дома ўжо сумняваюцца, колькі яна пратрымаецца на пасадзе. Сам Трамп яе дэбют пахваліў.
Кэці Закарыю прызначылі прэс-сакратаркай Белага дома 9 кастрычніка. Першы брыфінг яна правяла 13 кастрычніка — ён доўжыўся ўсяго каля чвэрці гадзіны.
Большую частку часу Закарыя чытала падрыхтаваны тэкст з пералікам дасягненняў Дональда Трампа. На пытанні засталося каля пяці з паловай хвілін. Слова атрымалі прадстаўнікі выданняў, прыхільных да амерыканскага прэзідэнта.
Калі Закарыя расказвала пра сям’ю, яна агаварылася: «Мой прэзідэнт… прабачце, мой муж».
А на пытанне карэспандэнта Fox News, ці спынілі ЗША перадачу разведвальнай інфармацыі Украіне, адказала: «Мне давядзецца вярнуцца да гэтага пытання».
Некалькі супрацоўнікаў адміністрацыі ў размове з CNN назвалі выступленне нязграбным і скаваным. Адзін з дарадцаў Трампа лічыць, што перад выхадам да журналістаў ёй варта было два тыдні трэніравацца адказваць на складаныя пытанні. Брыфінгі яе папярэдніцы Кэралайн Левіт у сярэднім доўжыліся каля 45 хвілін.
Ананімны прадстаўнік Белага дома ў каментары MS NOW папярэдзіў: «Ёй трэба вельмі хутка стаць значна лепшай, інакш яна паб’е рэкорд Скарамучы». Гаворка пра Энтані Скарамучы, які ў 2017 годзе пратрымаўся на пасадзе дырэктара па камунікацыях Белага дома ўсяго 11 дзён.
Да крытыкі далучыліся і аглядальнікі. Аўтар The Guardian напісаў, што Закарыя прадэманстравала «столькі ж цеплыні, мудрасці і палітычнага спрыту, колькі аватар штучнага інтэлекту».
Аднак публічна Трамп падтрымаў новую прэс-сакратарку: «На маю думку, яна выступіла вельмі добра».
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары