У мінскім ГУМе санстанцыя закрыла кафетэрый і сталовую

Працу кафетэрыя на першым паверсе і сталовай на чацвёртым паверсе мінскага ГУМа прыпынілі па патрабаванні Цэнтра гігіены і эпідэміялогіі Цэнтральнага раёна. Падставай сталі скаргі наведнікаў на прусакоў, якія з'явіліся ў сацыяльных сетках, піша агенцтва «Мінск-Навіны».

Фота: «Мінск-Навіны»

На мінулым тыдні ў Threads апублікавалі два паведамленні пра насякомых у пунктах грамадскага харчавання ГУМа. У адным выпадку карыстальнік паказаў прусака на торце з клубніцамі ў кафетэрыі і з іроніяй заўважыў, што той нібыта ацэньвае дэсерт «Паўлава». Іншая наведніца выклала фота прусака на сцяне ўстановы і расказала, што прыходзіла туды з сяброўкамі.

Фота: «Мінск-Навіны»

У каментарыях карыстальнікі жартавалі з нагоды здымкаў і абмяркоўвалі, ці не закрыюць гэтыя пункты харчавання, як гэта нядаўна адбылося з кафэ «Цьеры» ў гандлёвым цэнтры Dana Mall.

Спецыялісты Цэнтра гігіены і эпідэміялогіі Цэнтральнага раёна праверылі інфармацыю. Паводле іх слоў, па стане на 4 лістапада факты, пра якія паведамлялася ў сацыяльных сетках, пацвердзіліся. У сувязі з гэтым было вынесена патрабаванне прыпыніць працу кафетэрыя і сталовай, а таксама пачаты адміністрацыйны працэс у дачыненні да адказнай службовай асобы.

Цяпер спецыялісты збіраюць і аналізуюць матэрыялы, каб вызначыць, ці ёсць падставы для прыцягнення вінаватых да адміністрацыйнай адказнасці.

Каментары да артыкула