Арменію пазбавілі права голасу ў АДКБ

Арменію пазбавілі права голасу ў Арганізацыі Дамовы аб калектыўнай бяспецы (АДКБ). Пра гэта 11 лістапада паведаміў прэс-сакратар Крамля Дзмітрый Пяскоў.

Прэм'ер-міністр Арменіі Нікол Пашынян і прэзідэнт Расіі Уладзімір Пуцін на адным з самітаў АДКБ у 2023 годзе. Фота: Vladimir Smirnov, Sputnik, Kremlin Pool Photo via AP, File

Рашэнне прынялі лідары краін арганізацыі падчас сесіі Рады калектыўнай бяспекі АДКБ, якая прайшла ў Маскве. У ёй, сярод іншых, удзельнічаў Аляксандр Лукашэнка. Прычынай назвалі тое, што Арменія на працягу некалькіх гадоў не выконвала свае фінансавыя абавязацельствы перад арганізацыяй і мела запазычанасць.

Акрамя права голасу, Арменія страціла магчымасць вылучаць сваіх прадстаўнікоў на адказныя пасады ў АДКБ. Такім чынам, быў выкарыстаны 25‑ты артыкул статута арганізацыі. Ён прадугледжвае прыпыненне права вылучаць грамадзян на квотныя пасады і пазбаўленне права голасу, калі дзяржава на працягу двух гадоў не выконвае абавязацельствы па пагашэнні запазычанасці перад бюджэтам арганізацыі.

Згодна са статутам, Арменія зможа аднавіць свае правы пасля поўнага пагашэння доўгу. Пры гэтым у АДКБ заявілі, што пытанне аб выключэнні краіны з арганізацыі на саміце не разглядалася.

Напярэдадні міністр замежных спраў Расіі Сяргей Лаўроў адзначаў, што Арменія не падавала афіцыйнай заявы аб выхадзе з Еўразійскага эканамічнага саюза і АДКБ. Разам з тым прэм'ер-міністр краіны Нікол Пашынян неаднаразова заяўляў пра намер замарозіць членства Арменіі ў вайсковым блоку.

26 сакавіка 2025 года парламент Арменіі прыняў закон аб пачатку працэсу ўступлення краіны ў Еўрасаюз. Увесну 2026 года Арменія заявіла, што можа разгледзець выхад з ЕАЭС і АДКБ, калі цэны на расійскі газ стануць для яе непрымальнымі.

У канцы кастрычніка стала вядома, што Беларусь, Казахстан, Кыргызстан і Расія могуць разгледзець пытанне аб прыпыненні ўдзелу Арменіі ў ЕАЭС.

Каментары да артыкула