«Дзякуй жанчынам, якія дачакаліся». Tor Band паказалі сваю першую рэпетыцыю
Пасля чатырох гадоў зняволення музыкі Tor Band зноў граюць разам. На першай рэпетыцыі ў Польшчы яны выканалі лірычную песню «Наша лета», а відэа прысвяцілі жанчынам, якія дачакаліся сваіх мужоў або працягваюць іх чакаць.
Запіс з’явіўся ў інстаграме гурта. На відэа, знятым 14 лістапада, разам рэпетуюць Зміцер Галавач, Яўген Бурло і Андрэй Ярэмчык.
«Сёння пагралі крыху лірыкі, праз чатыры гады. Хто б што ні казаў, у тых месцах ты асабліва востра маеш патрэбу ў каханні! Дзякуй усім жанчынам, якія дачакаліся сваіх мужоў, і тым, якія чакаюць іх цяпер!» — падпісалі відэа музыкі.
Усіх траіх вызвалілі 16 верасня 2026 года ў межах перамоў паміж Беларуссю і ЗША і дэпартавалі ў Літву.
Tor Band з’явіўся ў Рагачове ў 2017 годзе. Шырокая вядомасць прыйшла да гурта ў 2020-м: песні «Мы не народец», «Жыве Беларусь» сталі сімваламі пратэснага руху. Нягледзячы на ціск, музыкі заставаліся ў Беларусі.
Іх затрымалі 28 кастрычніка 2022 года. Праз год Галавачу прысудзілі дзевяць гадоў калоніі, Бурло — восем, Ярэмчыку — сем з паловай. Іх абвінавацілі ў распальванні варожасці, стварэнні экстрэмісцкага фармавання, дыскрэдытацыі Беларусі і абразе Лукашэнкі.
За кратамі ў Бурло сур’ёзна пагоршылася здароўе. На абвяшчэнне прысуду ён прыйшоў на мыліцах і не змог устаць.
У лютым 2026 года былы палітвязень Ігар Лосік расказваў, што музыка перанёс аперацыю на правай назе і тэрмінова меў патрэбу ў аперацыі на другой. «Мне расказваў, што гэта было пекла», — пісаў Лосік.